សៀមរាប៖ ភ្ញៀវទេសចរជាតិ អន្តរជាតិ មានប្រមាណជាង១ម៉ឺននាក់ នៅថ្ងៃទី ២១ ខែមិនានេះ បាននាំគ្នាទៅចូលរួមទស្សនព្រឹត្តការណ៍ «ថ្ងៃរះចំកំពូលកណ្តាល» ប្រាសាទអង្គរវត្តដែលព្រឹត្តការណ៍ដ៏សំខាន់ប្រចាំឆ្នាំរបស់ប្រទេសកម្ពុជា។
ភ្ញៀវទេសចរជាតិ អន្តរជាតិ ក្មេងចាស់ប្រុសស្រី បានក្រោកមកតាំងពីម៉ោង៥ព្រឹក ដើម្បីរង់ចាំទស្សនាព្រឹត្តិការណ៍ព្រះអាទិត្យរះឡើងកាត់តាមកំពូលកណ្តាល នៃប្រាសាទអង្គរវត្តនេះ ដោយសារអាកាសធាតុនាព្រឹកព្រលឹមនេះ មានអំណោយផលល្អ ទេសចរអាចទស្សនា និង ផ្តិតយកទិដ្ឋភាពថ្ងៃរះ គួរទីជាគយគនបានយ៉ាងរីករាយ។
អ្នកទេសចរ បង្ហាញអាម្មណ៍រំភើប ពេលបានមកទស្សនាថ្ងៃរះ នៅប្រាសាទអង្គរវត្តដ៏ស្កឹមស្កៃ ជាមួយនឹងមនុស្សជាច្រើនពាន់នាក់ និង បានសម្ដែងមោទកភាពចំពោះភាពអស្ចារ្យនៃស្នាដៃរបស់ដូនតាខ្មែរ ដែលបានកសាងសំណង់ប្រាសាទដ៏អច្ឆរិយមួយនេះ។
ព្រឹត្តិការណ៍សមរាត្រី (Equinox) តែងតែកើតមាន២ដង ជារៀងរាល់ឆ្នាំ គឺនៅរដូវប្រាំង (Vernal Equinox) កើតទ្បើងនៅខែមីនា និងសមរាត្រីរដូវវស្សា (Autumnal Equinox) កើតទ្បើងនៅខែកញ្ញា។ជារៀងរាល់ឆ្នាំតែងតែមានភ្ញៀវទេសចរជាតិអន្តរជាតិរាប់ម៉ឺននាក់ បានមកទស្សនា និងផ្តិតយករូបភាពព្រឹត្តិការណ៍ដ៏អស្ចារ្យនេះ។
