ភ្នំពេញ៖ ប្រមុខរាជរដ្ឋាភិបាលកម្ពុជា សម្តេច ហ៊ុន សែន ប្រកាសឱ្យគណៈកម្មការចំពោះកិច្ចចាក់វ៉ាក់សាំងកម្ពុជា ចាប់ផ្តើមចាក់វ៉ាក់សាំងបង្ការជំងឺកូវីដ១៩ ដូសជំរុញទី៥ ដល់ប្រជាពលរដ្ឋខ្មែរ ចាប់ពីថ្ងៃទី០៩ ខែមិថុនា ឆ្នាំ២០២២តទៅ សម្រាប់អ្នកដែលបានចាក់ដូសទី៤ រួចហើយ ដែលមានគម្លាតរយៈពេល៣ខែ។
យោងតាមសារសំឡេងនៅថ្ងៃនេះ សម្តេច ហ៊ុន សែន បានបញ្ជាក់ថា អ្នកដែលបានចាក់ដូសទី៤ រួចហើយកន្លងមកនៅក្នុងប្រទេសកម្ពុជា មានដូចជា មន្រ្តីរាជការ អ្នកការទូត អ្នកសារព័ត៌មាន និងសិល្បករសិល្បការិនីជាដើម។សម្តេច បានអំពាវនាវឱ្យប្រជាពលរដ្ឋបន្តរក្សានូវស្ថានភាពដ៏ល្អប្រសើរនេះ តាមរយៈការការពារខ្លួន ចំពោះមុខជំងឺកូវីដ១៩ ដែលមិនទាន់បានបញ្ចប់ និងទទួលយកវ៉ាក់សាំង។
