អាស៊ាន៖ រដ្ឋមន្ត្រីក្រសួងដឹកជញ្ជូននៃប្រទេសអាស៊ានទាំងប្រាំពីរបានសន្យារួមគ្នាថា នឹងសហការគ្នាលើសមត្ថភាពដឹកអ្នកដំណើរ ការអភិវឌ្ឍន៍ប្រកបដោយនិរន្តរភាព និងសុវត្ថិភាពជាដើម ដោយបានបញ្ជាក់ពីការគាំទ្រក្នុងការស្តារឡើងវិញនូវឧស្សាហកម្មអាកាសចរណ៍។
យោងតាមកាសែត "Lianhe Zaobao" បានរាយការណ៍ថា រដ្ឋមន្ត្រីក្រសួងដឹកជញ្ជូននៃប្រទេសសិង្ហបុរី ប្រ៊ុយណេ កម្ពុជា ឥណ្ឌូនេស៊ី ម៉ាឡេស៊ី ហ្វីលីពីន និងថៃ បានចេញសេចក្តីថ្លែងការណ៍រួមនៅថ្ងៃនេះក្នុងកិច្ចប្រជុំកំពូលអាកាសចរណ៍ Changi លើកដំបូងដោយបានចង្អុលបង្ហាញថា ការរីករាលដាលនៃជំងឺកូវីដ១៩បានជះឥទ្ធិពលយ៉ាងខ្លាំងដល់វិស័យអាកាសចរណ៍ទូទាំងពិភពលោក ដោយបានប៉ះពាល់ សេដ្ឋកិច្ច និងការអភិវឌ្ឍន៍សង្គម និងការតភ្ជាប់គ្នារវាងក្នុងតំបន់ និងក្រៅតំបន់។
ដោយមើលឃើញពីសកម្មភាពឆ្លើយតបរបស់ប្រទេសនានា និងយន្តការផ្ទៀងផ្ទាត់ទូទៅសម្រាប់វិញ្ញាបណ្ណប័ត្របញ្ជាក់កូវីដ១៩ ដែលបានឯកភាពគ្នាក្នុងកិច្ចប្រជុំថ្នាក់រដ្ឋមន្ត្រីសុខាភិបាលអាស៊ានលើកទី១៥ តំណាងនៃប្រទេសទាំងប្រាំពីរបានសន្យាគាំទ្រកិច្ចសហប្រតិបត្តិការយ៉ាងជិតស្និទ្ធរវាងប្រទេស អង្គការអន្តរជាតិ ឧស្សាហកម្ម និងអ្នកពាក់ព័ន្ធក្នុងការកសាង និងស្តារឡើងវិញជាបន្ទាន់នូវការតភ្ជាប់អាកាសចរណ៍ និងវិស័យអាកាសចរណ៍ស៊ីវិល។
សេចក្តីថ្លែងការណ៍បានបង្ហាញថា បណ្តាប្រទេសនានាសន្យាលើកកម្ពស់ការបណ្តុះបណ្តាល និងសមត្ថភាពដឹកអ្នកដំណើរ ហើយក៏ជំរុញឱ្យមានការផ្លាស់ប្តូរ និងការពិគ្រោះយោបល់ជាបន្តរវាងការដឹកជញ្ជូន សុខភាពសាធារណៈ និងភ្នាក់ងារអន្តោប្រវេសន៍ ដើម្បីគាំទ្រដល់ការស្តារឡើងវិញ និងកំណើននៃវិស័យអាកាសចរណ៍ស៊ីវិល និងធានាការធ្វើដំណើរតាមផ្លូវអាកាសឆ្លងកាត់ព្រំដែន និង ចលនារបស់មនុស្ស ប្រកបដោយសុវត្ថិភាព និងប្រសិទ្ធភាព។
ប្រទេសនានាក៏នឹងជំរុញ ចែករំលែក និងអនុវត្តកម្មវិធីប្រកបដោយនិរន្តរភាពតាមរយៈការពង្រឹងកិច្ចសហប្រតិបត្តិការក្នុងតំបន់ និងអន្តរជាតិ រួមទាំងបច្ចេកវិទ្យាការពារបរិស្ថាន ការកែលម្អសមត្ថភាពមនុស្ស និងស្ថាប័ន និងការគាំទ្រដល់ការចំណាយ ប្រកបដោយនិរន្តរភាព និងគំរូផលិតកម្ម។
ជាមួយគ្នានេះ អ្នកតំណាងប្រទេសក៏បានលើកទឹកចិត្តអភិវឌ្ឍន៍រួមគ្នានៃវិធានការសុខភាពសាធារណៈ និងសុវត្ថិភាពទូទៅ ដើម្បីការពារសុវត្ថិភាព និងសុខុមាលភាពរបស់អ្នកធ្វើដំណើរ និងបុគ្គលិកក្នុងឧស្សាហកម្មដឹកជញ្ជូន។ វិធានការទាំងនេះនឹងធានាបាននូវកម្រិតខ្ពស់បំផុតនៃសុវត្ថិភាព ដោយផ្អែកលើស្តង់ដារ និងអនុសាសន៍របស់ ICAO ដើម្បីទទួលបានអត្ថប្រយោជន៍យ៉ាងពេញលេញពីកិច្ចសហប្រតិបត្តិការត្រួតពិនិត្យក្នុងតំបន់ និងការរួមគ្នា៕
