ចិន៖ ក្រុមហ៊ុនHuaweiបានចេញសេចក្តីប្រកាសកាលពីថ្ងៃទី១៨ខែឧសភាកន្លងទៅ ដើម្បីប្រឆាំងយ៉ាងដាច់ខាតទៅលើក្រសួងពាណិជ្ជកម្មអាមេរិក ដែលបន្ថែមការដាក់កំហិត ទៅលើការនាំចេញផលិតផលអាមេរិករបស់ក្រុមហ៊ុនHuawei។ នេះបើតាមព័ត៌មានពីវិទ្យុមិត្តភាពខ្មែរចិន ។
យោងតាមសេចក្តីប្រកាសរបស់ក្រុមហ៊ុនបច្ចេកទេសHuawei បានឱ្យដឹងថា រដ្ឋាភិបាលអាមេរិកបានពង្រីក និងធ្វើវិសោធនកម្មច្បាប់ឥតឈប់ឈរ គឺគ្រាន់តែសំដៅចំពោះផលិតផលរបស់ក្រុមហ៊ុនHuawei ប៉ុណ្ណោះ ដែលផ្ទុយពីការការពារសន្តិសុខក្នុងបណ្តាញអ៊ិនធើណិត ដែលអាមេរិកតែងតែផ្សព្វផ្សាយនោះ។
បន្ថែមពីនេះ ការធ្វើវិសោធនកម្មច្បាប់លើកនេះនឹងប៉ះពាល់យ៉ាងខ្លាំងដល់ឧស្សាហកម្មពាក់ព័ន្ធលើពិភពលោក នឹងធ្វើឱ្យប្រជាជនជាង ៣ពាន់លាននាក់ និងប្រទេសជាង១៧០ដែលប្រើប្រាស់ផលិតផល និងសេវារបស់ក្រុមហ៊ុនបច្ចេកទេសHuaweiរងផលប៉ះពាល់ដោយផ្ទាល់ផងដែរ។
សូមបញ្ជាក់ថា អាមេរិកគាបសង្កាត់សហគ្រាសប្រទេសផ្សេងទៀតតាមរយៈឧត្តមភាពខាងបច្ចេកទេសខ្លួន ដែលអាចធ្វើឲ្យទំនុកចិត្តរបស់សហគ្រាសប្រទេសផ្សេងទៀតក្នុងការប្រើប្រាស់បច្ចេកទេសរបស់អាមេរិកបាត់បង់បន្តិចម្ដងៗ ចុងក្រោយនឹងបំផ្លាញផលប្រយោជន៍របស់អាមេរិកខ្លួនឯងជាមិនខាន៕