កាណាដា៖ អាជ្ញាធរកាណាដា បានធ្វើការជំរុញកាលពីថ្ងៃអាទិត្យ ដើម្បីដកអ្នកតវ៉ាចុងក្រោយចេញពីស្ពានឯកអគ្គរដ្ឋទូត និងតំបន់ជុំវិញបន្ទាប់ពីបានបិទច្រកព្រំដែនក្នុងទីក្រុង Windsor រដ្ឋ Ontario ជាមួយនឹងរបាំងការពារកាលពីសប្តាហ៍មុន។
ប៉ូលិសបានចាប់ផ្តើមចាប់ខ្លួនបាតុករដែលមិនគោរពច្បាប់ និងអូសរថយន្តដែលគាំទ្រការតវ៉ារបស់អ្នកបើកបររថយន្តដឹកទំនិញដើម្បីប្រឆាំងនឹងវិធានការណ៍កូវីដ១៩ នៅក្នុងប្រទេសកាណាដាកាលពីថ្ងៃសៅរ៍។ ប៉ូលិសបានរុញបាតុកររាប់សិបនាក់កាលពីថ្ងៃអាទិត្យ ឱ្យឆ្ងាយពីស្ពានមុនពេលចាប់ខ្លួន ក្នុងនោះមានរាប់សិបនាក់នេះបើតាមអាជ្ញាធរ។
អ្នកនាំពាក្យប៉ូលីស Windsor លោក Steve Betteridge បានប្រាប់អ្នកយកព័ត៌មានថា មនុស្សប្រហែល ១២ នាក់ត្រូវបានចាប់ខ្លួនពីការតវ៉ា ហើយបានអះអាងថា មិនមានឧប្បត្តិហេតុហិង្សារវាងបាតុករ និងប៉ូលីសទេ។
រថយន្តប្រមាណ១០គ្រឿងនៅតំបន់នោះក៏ត្រូវបានសណ្តោងដែរ បន្ទាប់ពីមិនព្រមផ្លាស់ទីដោយខ្លួនឯង ហើយស្ពាននេះត្រូវបានគេរំពឹងថា នឹងបើកដំណើរការឡើងវិញនៅរសៀលថ្ងៃអាទិត្យ។
កាលពីថ្ងៃសុក្រ ប្រធានតុលាការជាន់ខ្ពស់នៃរដ្ឋ Ontario បានផ្តល់ដីកាបង្គាប់ឱ្យក្រុមបាតុករចាកចេញពីតំបន់នោះនៅយប់នោះ បន្ទាប់ពីការបិទផ្លូវដែលអូសបន្លាយអស់ជាច្រើនថ្ងៃ៕
