តូក្យូ៖ ប្រទេសជប៉ុនបានរាយការណ៍ ពីករណីដែលបានបញ្ជាក់ថ្មីចំនួន ២.១៩៨ ករណីនៅថ្ងៃទី ១២ ដែលកើនឡើងទ្វេដងពីមួយថ្ងៃមុន។ នេះជាលើកទីមួយ ហើយដែលប្រទេសនេះ មានករណីកើនឡើងប្រចាំថ្ងៃជាង ២,០០០ ក្នុងរយៈពេលប្រហែល ៤ ខែ។
អភិបាលក្រុងតូក្យូ លោកស្រី Yuriko Koike បាននិយាយកាលពីថ្ងៃទី ១២ ថា ជាង ៩០% នៃករណីថ្មី ត្រូវបានគេសង្ស័យថា បានឆ្លងកូវីដ១៩បំលែងថ្មី អូមីក្រុង។ លោកស្រី បានអំពាវនាវដល់រដ្ឋាភិបាលកណ្តាលកុំឱ្យរង់ចាំសូចនាករជាក់លាក់ ដើម្បីឈានដល់ការកំណត់វិធានការពាក់ព័ន្ធ ដើម្បីចាត់វិធានការ ប៉ុន្តែត្រូវចាត់វិធានការបង្ការជំងឺរាតត្បាតភ្លាមៗដូចជា ការប្រកាសភាពអាសន្នក្នុងលក្ខណៈទាន់ពេលវេលា ស្របតាមតម្រូវការរបស់អភិបាលខេត្តនានា។
នៅពេលចូលរួមកិច្ចប្រជុំតាមអ៊ិនធរណេតរបស់អភិបាលជប៉ុននៅថ្ងៃនោះ លោកស្រី Koike បាននិយាយថា នៅថ្ងៃចូលឆ្នាំសាកល ចំនួនអ្នកឆ្លងថ្មីក្នុងមួយថ្ងៃ បានកើនឡើង ២៧ ដងក្នុងរយៈពេលត្រឹមតែ ១០ ថ្ងៃប៉ុណ្ណោះ ហើយជំងឺអូមីក្រុង កំពុងរីករាលដាលនៅអត្រាប្រកាសអាសន្ន។
នៅថ្ងៃទី ១២ មានករណីដែលត្រូវបានបញ្ជាក់ថ្មីជាង ១,៣០០០ នៅក្នុងប្រទេសជប៉ុន ហើយការកើនឡើងប្រចាំថ្ងៃនៃករណីលើសពី ១០,០០០ ម្តងទៀត។ យោងតាមសារព័ត៌មានក្យូដូ រលកទី៥នៃរោគរាតត្បាតក្នុងប្រទេសជប៉ុន បានធូរស្រាលយ៉ាងខ្លាំងបន្ទាប់ពីពាក់កណ្តាលខែកញ្ញាឆ្នាំមុន ហើយរហូតដល់ចុងខែធ្នូឆ្នាំមុន ចំនួនករណីថ្មីក្នុងមួយថ្ងៃៗនៅទូទាំងប្រទេសមានស្ថិរភាពនៅ២០០ ទៅ៣០០ករណី ។ ចូលដល់ឆ្នាំ ២០២២ អូមីក្រុង បានរីករាលដាលនៅក្នុងប្រទេសជប៉ុន ដែលបណ្តាលឱ្យមានការកើនឡើងយ៉ាងខ្លាំងនាពេលថ្មីៗនេះ៕
