【វីដេអូ】លេខាបក្សស្រុកម្នាក់នៅទីក្រុងស៊ីអានត្រូវបានដកចេញពីតំណែង ក្រោយមានករណីឆ្លង១៥៧៣នាក់

ចិន៖ លេខាបក្សស្រុកយានតា（Yan Ta） និងប្រធានស្រុកទាំងពីរត្រូវបានដកចេញពីមុខតំណែង ក្រោយជំងឺកូវីដ១៩ ឆ្លងចូលសហគមន៍នៅក្នុងទីក្រុងស៊ីអាន ខេត្តសានស៊ី បានផ្ទុះឡើង ដោយមានករណីឆ្លងសរុបចំនួន ១៥៧៣ ធ្វើឲ្យទីក្រុងនេះ ស្ថិតនៅក្នុងរលកថ្មីនៃរីករាលដាលនៃជំងឺកូវីដ១៩។

លោក ឈិន បាវចុង (Chen Baozhong) នាយកមជ្ឈមណ្ឌលគ្រប់គ្រង និងបង្ការជំងឺ ស៊ីអានបាននិយាយថា នាពេលបច្ចុប្បន្ននេះ ហានិភ័យនៃការឆ្លងសហគមន៍នៅតែមាន។ ហើយតំបន់ដែលមានហានិភ័យខ្ពស់តែមួយគត់នៅក្នុងទីក្រុងស៊ីអាន គឺសហគមន៍សាកលវិទ្យាល័យឆាងអាន（Chang An）នៅ ស្រុកយានតា ។

បើតាមសារព័ត៌មាន សានស៊ីបានផ្សាយថា លោក យ៉ានជៀនឈៀង（Yang Jian Q iang） អភិបាលរងក្រុង ស៊ីអាន នឹងកាន់តំណែងជាលេខាគណៈកម្មាធិការបក្សស្រុកយានតា ហើយលោក វាង ពិន （Wang Bin）ត្រូវបានដកចេញពីតំណែង លេខាបក្សស្រុកយានតា លោក ឈូ សឺយៀ（Cui Si Yue） លេខារងបក្សស្រុកយានតាក៏ត្រូវបានដកតំណែងផងដែរ។

យោងតាមប្រភពអ្នកដែលដឹងរឿងបានឪ្យដឹងថា មន្រ្តីថ្នាក់ការិយាល័យរងមួយរូបទៀត ត្រូវបានដក ចេញពីស្រុកយានតា។ បន្ថែមពីលើនេះ ក៏មានកម្មាភិបាលរងថ្នាក់ការិយាល័យចំនួនពីរនៅក្នុងស្រុកកោលស៊ីន（Gao Xin）នៃទីក្រុងស៊ីអាន ដែលត្រូវបានដកចេញពីមុខតំណែងដោយសារតែបញ្ហាការពារ និងគ្រប់គ្រងការរីករាលដាលនៃជំងឺកូវីដ១៩។

លោក លីវ គួកចុង （Liu Guo Zhong） លេខាគណៈកម្មាធិការបក្សខេត្ត សានស៊ី បានសង្កត់ធ្ងន់ថា ការបង្ការ និងគ្រប់គ្រងការរីករាលដាលនៃជំងឺកូវីដ១៩នាពេលនេះ គឺជាពេលវេលាដ៏លំបាកបំផុត ហើយយើងត្រូវតែម៉ឺងម៉ាត់ក្នុងការទប់ស្កាត់ និងគ្រប់គ្រងជំងឺកូវីដ១៩៕