អឺរ៉ុប៖ សហភាពអឺរ៉ុបបានណែនាំបណ្ណចាក់វ៉ាក់សាំងនៅទូទាំងប្លុកនៅក្នុងខែកក្កដា ក្នុងការដាក់ឲ្យដំណើរការ ដើម្បីចាប់ផ្តើមការធ្វើដំណើរឡើងវិញដោយសេរីនៅទូទាំងរដ្ឋជាសមាជិក ប៉ុន្តែការកើតឡើងវិញនៃការរីករាលដាលដោយកូវីដ១៩បំលែងថ្មី«អូមីក្រុង» បាននាំឱ្យប្រទេសមួយចំនួនដាក់វិធានការណ៍ការធ្វើដំណើរដ៏តឹងរ៉ឹង។
រដ្ឋជាសមាជិកសហភាពអឺរ៉ុប បានបរាជ័យក្នុងការឈានដល់កិច្ចព្រមព្រៀងលើវិធីសាស្រ្តបង្រួបបង្រួមចំពោះកូវីដ១៩បំលែងថ្មី«អូមីក្រុង» ក្នុងអំឡុងពេលកិច្ចប្រជុំកំពូលនៅទីក្រុងព្រុចសែល ដោយសារការកើនឡើងករណីឆ្លង បានបង្កឱ្យមានការរឹតបន្តឹងថ្មីនៅក្នុងប្រទេសមួយចំនួន។
ប្រទេសក្រិក អៀរឡង់ និងព័រទុយហ្គាល់ ថ្មីៗនេះបានប្រកាសវិធានការសុវត្ថិភាពសម្រាប់បុគ្គលដែលមកដល់ពីរដ្ឋសមាជិកសហភាពអឺរ៉ុប ខណៈដែលពួកគេព្យាយាមកំណត់ការរីករាលដាលនៃកូវីដ១៩បំលែងថ្មី«អូមីក្រុង» នៅទូទាំងទ្វីប។ ប្រទេសអ៊ីតាលីគ្រោងនឹងចូលរួម ជាមួយពួកគេនៅប៉ុន្មានថ្ងៃខាងមុខនេះ ដោយតម្រូវឱ្យអ្នកមកដល់ទាំងអស់បង្ហាញការធ្វើតេស្តអវិជ្ជមាន ដោយមិនគិតពីស្ថានភាពនៃការបានចាក់វ៉ាក់សាំងឡើយ។
ប្រទេសទាំង៤ បានធ្វើសកម្មភាពបើទោះបីជារដ្ឋជាសមាជិកទាំង ២៧ របស់សហភាពអឺរ៉ុបកំពុងស្ថិតក្នុងការជជែកដេញដោលអំពីរបៀបដាក់ចេញនូវគោលនយោបាយធ្វើដំណើរជុំវិញប្លុក ដែលបានសម្របសម្រួល ដោយមិនរារាំងដល់ការធ្វើដំណើរដោយសេរី។
នៅមុនកិច្ចប្រជុំកំពូលរបស់មេដឹកនាំសហភាពអឺរ៉ុបនៅថ្ងៃព្រហស្បតិ៍ នាយករដ្ឋមន្ត្រីលុចហ្សាមបួ លោក Xavier Bettel បាននិយាយថា «ការបិទព្រំដែននៅក្នុងករណីណាក៏ដោយ មិនមែនជាដំណោះស្រាយ ក្នុងការប្រយុទ្ធប្រឆាំងនឹង អូមីក្រុង នោះទេ»។ ខណៈមេដឹកនាំឡាតវី Krisjanis Karins បានយល់ស្របថា សេរីភាពក្នុងការធ្វើដំណើរឆ្លងកាត់សហភាពអឺរ៉ុប មិនត្រូវប៉ះពាល់ឡើយ។
ភាពមិនច្បាស់លាស់ក្នុងចំណោមបណ្តាប្រទេសសហភាពអឺរ៉ុប កើតឡើងបន្ទាប់ពីមជ្ឈមណ្ឌលអឺរ៉ុបសម្រាប់ការបង្ការ និងគ្រប់គ្រងជំងឺបានប្រកាសថា ខ្លួនជឿថា អូមីក្រុង អាចឆ្លងច្រើនជាង ហើយទំនងជាក្លាយជាប្រភេទកូវីដ១៩ លេចធ្លោនៅអឺរ៉ុបក្នុងរយៈពេលពីរខែដំបូងនៃឆ្នាំ ២០២២៕
