Cct850x100 1
1800px x h300px kh

មន្រ្តីជាន់ខ្ពស់ការពារជាតិឥណ្ឌាបានស្លាប់នៅក្នុងគ្រោះថ្នាក់ធ្លាក់ឧទ្ធម្ភាគចក្រ

អន្តរជាតិ
/
អ្នកយកព័ត៌មាន:
លី ម៉ាលីង
/
មន្រ្តីជាន់ខ្ពស់ការពារជាតិឥណ្ឌាបានស្លាប់នៅក្នុងគ្រោះថ្នាក់ធ្លាក់ឧទ្ធម្ភាគចក្រ ប្រភពរូប៖ ស៊ីនហួរ

ឥណ្ឌា៖ កងទ័ពអាកាសឥណ្ឌា បាននិយាយថា ឧទ្ធម្ភាគចក្រយោធាមួយគ្រឿង ដែលដឹកដោយអគ្គសេនាធិការឥណ្ឌាលោក Bipin Rawat បានធ្លាក់នៅរដ្ឋ Tamil Nadu ភាគខាងត្បូងប្រទេសឥណ្ឌា កាលពីថ្ងៃទី៨ ក្នុងចំណោមមនុស្សជិះលើឧទ្ធម្ភាគចក្រទាំង១៤នាក់នោះ មាន ១៣នាក់បានស្លាប់ រួមទាំងលោក Bipin Rawat ។

លោក Rawat បានយកឧទ្ធម្ភាគចក្រ Mi-17 ផលិតនៅប្រទេសរុស្សីពីមូលដ្ឋានទ័ពអាកាសនៅ Suluer ទៅកាន់មហាវិទ្យាល័យបុគ្គលិកការពារជាតិ ដើម្បីថ្លែងសុន្ទរកថា។ កងទ័ពអាកាសឥណ្ឌាបាននិយាយនៅលើប្រព័ន្ធផ្សព្វផ្សាយសង្គម Twitter ថា នៅពេលថ្ងៃត្រង់ ឧទ្ធម្ភាគចក្របានហោះនៅជិត Coonoor មិនឆ្ងាយពីគោលដៅ ហើយ "បានទទួលរងនូវឧបទ្ទវហេតុ" អំឡុងពេលចុះចត។

រូបភាពវីដេអូនៃកន្លែងធ្លាក់ឧទ្ធម្ភាគចក្រ បានបង្ហាញថា ក្រុមអ្នកជួយសង្គ្រោះបានចាក់ទឹកទៅលើបំណែកយន្តហោះដែលកំពុងឆេះ។ ប្រពន្ធរបស់លោក Bipin Rawat និងមនុស្ស ១២ នាក់ទៀតបានទៅជាមួយ។

សារព័ត៌មានឥណ្ឌាពីមុនបានរាយការណ៍ថា ក្រុមអ្នកជួយសង្គ្រោះបានរកឃើញសាកសពជាច្រើននៅកន្លែងកើតហេតុ ហើយអ្នករបួសជាច្រើននាក់ត្រូវបានបញ្ជូនទៅមន្ទីរពេទ្យ រួមទាំង Rawat ផងដែរ។ ក្រោយមក កងទ័ពអាកាសឥណ្ឌាបានបញ្ជាក់ថា មនុស្សសរុបចំនួន ១៣ នាក់ត្រូវបានស្លាប់ រួមទាំង លោក Rawat និងប្រពន្ធរបស់គាត់ និងសមាជិកនាវិក ៤ នាក់ផងដែរ។

ចំណែកអ្នកនៅរស់រានមានជីវិតតែម្នាក់គត់ គឺជាមន្ត្រីមកពីមហាវិទ្យាល័យបុគ្គលិកការពារជាតិ ដែលកំពុងសម្រាកព្យាបាលនៅមន្ទីរពេទ្យយោធាក្បែរនោះ។

លោក Rawat មានអាយុ ៦៣ ឆ្នាំ គាត់គឺជាអគ្គសេនាធិការនៃកងទ័ពឥណ្ឌា និងមានទំនាក់ទំនងជិតស្និទ្ធជាមួយនាយករដ្ឋមន្ត្រីឥណ្ឌា Narendra Modi ។ បន្ទាប់ពី Modi បានបង្កើតមុខតំណែងជាប្រធានបុគ្គលិកការពារជាតិសម្រាប់ការធ្វើសមាហរណកម្មនៃកងទ័ព ជើងទឹក និងទ័ពអាកាសក្នុងឆ្នាំ ២០១៩លោក Rawat បានកាន់តំណែងខ្ពស់បំផុតនៅក្នុងកងទ័ពឥណ្ឌា។

កងទ័ពអាកាសឥណ្ឌាបាននិយាយថា ខ្លួននឹងស៊ើបអង្កេតរកមូលហេតុនៃការធ្លាក់យន្តហោះ។ ខណៈរដ្ឋមន្ត្រីក្រសួងការពារជាតិឥណ្ឌាលោក Rajnath Singh បាននិយាយនៅលើ Twitter ថាការធ្លាក់យន្តហោះអាចទាក់ទងនឹងលក្ខខណ្ឌអាកាសធាតុអាក្រក់៕

Khcct banner

អត្ថបទទាក់ទង