ភ្នំពេញ៖ នៅថ្ងៃទី២៨ ខែមេសានេះ ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីអំពាវនាវជាសាធារណៈដល់ពលករខ្មែរនៅកូរ៉េ និងប្រទេសផ្សេងទៀត ឲ្យមានការអត់ធ្មត់កុំអាលមកកម្ពុជានៅដំណាក់កាលនៃជំងឺកូវីដ-១៩។ នេះបើតាមការអំពាវនាវរបស់លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ។
បើតាមលោក ហេង សួរ បានគូសបញ្ជាក់ថា ករណីដែលពលករខ្មែរនៅក្រៅប្រទេសមកកម្ពុជា នឹងត្រូវដាក់ដោយឡែករយៈពេល ១៤ថ្ងៃ ហើយពេលត្រឡប់ទៅវិញគឺត្រូវអាជ្ញាធរប្រទេសគេឃាត់ ១៤ថ្ងៃទៀត ហើយម្ចាស់ក្រុមហ៊ុនអាចឈានដល់ការលុបទិដ្ឋាការទៀត។
អ្នកនាំពាក្យក្រសួងការងាររូបនេះបានបន្ថែមថា ក្នុងដំណាក់កាលនេះនិយោជកខ្លះក៏លំបាកដែរ ហើយចង់តែកាត់បុគ្គលិកចោលទេ ដូច្នេះពលករខ្មែរកុំផ្តល់លេសស្របច្បាប់ឲ្យទៅគេ ដោយគ្រាន់តែការសម្រេចចិត្តខុសមួយគ្រា ធ្វើឲ្យខាតពេលវេលា និងបាត់បង់ការងារ។
ជាមួយគ្នានេះ ក្រសួងការងារអំពាវនាវ និងសំណូមពរដល់ពលករខ្មែរនៅក្រៅប្រទេសទាំងអស់ឲ្យមានការប្រុងប្រយ័ត្ន ខំរក្សាការងារ និងអត់ធ្មត់នៅក្នុ្ងងដំណាក់កាលនេះ ដើម្បីចូលរួមទប់ស្កាត់ការរីករាលដាលនៃការឆ្លងជំងឺកូវីដ-១៩៕