Cct850x100 1
1800px x h300px kh

អឺរ៉ុបកំពុងធ្វើវឌ្ឍនភាពលើវិបត្តិជនភៀសខ្លួនបេឡារុស្ស តែភាពតានតឹងនៅតែកើនឡើង

អន្តរជាតិ
/
អ្នកយកព័ត៌មាន:
លី ម៉ាលីង
/
អឺរ៉ុបកំពុងធ្វើវឌ្ឍនភាពលើវិបត្តិជនភៀសខ្លួនបេឡារុស្ស តែភាពតានតឹងនៅតែកើនឡើង ប្រភពរូប៖ RTE

អឺរ៉ុប៖ សហភាពអឺរ៉ុបបាននិយាយថា ខ្លួនកំពុងធ្វើឱ្យមានវឌ្ឍនភាពលើការដោះស្រាយវិបត្តិជនចំណាកស្រុកនៅតាមព្រំដែនបេឡារុស្ស-ប៉ូឡូញ ប៉ុន្តែភាពតានតឹងនៅតែមានកម្រិតខ្ពស់ជាមួយនឹងមនុស្សរាប់រយនាក់ដែលជាប់នៅទីនោះ។

យោងតាមការចុះផ្សាយរបស់ RTE បន្ទាប់ពីប៉ូឡូញបានបញ្ជូនទាហានរាប់ពាន់នាក់ទៅកាន់តំបន់នោះ បេឡារុស្សបាននិយាយនៅថ្ងៃនេះថា ខ្លួននឹង "ឆ្លើយតបយ៉ាងតឹងរ៉ឹងចំពោះការវាយប្រហារណាមួយ" ហើយបានប្រកាសធ្វើសមយុទ្ធរួមគ្នាជាមួយទាហានឆ័ត្រយោងរុស្ស៊ីនៅជិតព្រំដែនទេ។

លោកខាងលិចបានចោទប្រកាន់មេដឹកនាំបេឡារុស្សលោក Alexander Lukashenko ថាបានទាក់ទាញជនចំណាកស្រុករាប់ពាន់នាក់ពីមជ្ឈិមបូព៌ាទៅកាន់ប្រទេសប៉ូឡូញ ដើម្បីបញ្ជូនឆ្លងកាត់ព្រំដែនក្នុងការសងសឹកចំពោះការដាក់ទណ្ឌកម្ម។

ជនចំណាកស្រុកប្រហែល 2,000 នាក់ ភាគច្រើនជាជនជាតិមកពីមជ្ឈិមបូព៌ា បានជាប់គាំងអស់ជាច្រើនថ្ងៃនៅតាមព្រំដែនក្នុងសីតុណ្ហភាពត្រជាក់ ខណៈអង្គការសុខភាពពិភពលោកបាននិយាយថា វាពិតជាមាន "ការព្រួយបារម្ភខ្លាំង" អំពីស្ថានភាពរបស់ពួកគេ។

វិធានការនានាកំពុងត្រូវបានចាប់ផ្ដើម ដើម្បីទប់ស្កាត់លំហូរជនចំណាកស្រុក ដោយប្រទេសតួរគីបាននិយាយថា ជនជាតិអ៊ីរ៉ាក់ ស៊ីរី និងយេម៉ែន នឹងមិនត្រូវបានអនុញ្ញាតនៅលើជើងហោះហើរពីតួរគីទៅកាន់ប្រទេសបេឡារុស្សទៀតទេ។ ប្រទេសអ៊ីរ៉ាក់ ក៏បាននិយាយថា ខ្លួនកំពុងរៀបចំបញ្ជីឈ្មោះពលរដ្ឋរបស់ខ្លួន ដែលត្រូវបានរារាំងនៅតាមព្រំដែន ដែលចង់ត្រឡប់ទៅផ្ទះវិញ ហើយត្រៀមខ្លួនរួចរាល់ក្នុងការរៀបចំធ្វើមាតុភូមិនិវត្តន៍។

គណៈប្រតិភូអាមេរិក និងអឺរ៉ុបនៅក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិកាលពីម្សិលមិញបានចោទប្រកាន់ប្រទេសបេឡារុស្សពីបទបង្កគ្រោះថ្នាក់ដល់អាយុជីវិតសម្រាប់គោលបំណងនយោបាយ និងព្យាយាមបង្វែរការយកចិត្តទុកដាក់ "ពីការរំលោភសិទ្ធិមនុស្សដែលកំពុងកើនឡើងរបស់ខ្លួន"។

បេឡារុស្ស និងរុស្ស៊ីបានចោទប្រកាន់បណ្តាប្រទេសសហភាពអឺរ៉ុបថា មិនបានរស់នៅតាមស្តង់ដារអន្តរជាតិដោយការរារាំងជនចំណាកស្រុកដែលពួកគេនិយាយថា កំពុងស្វែងរកជម្រក បន្ទាប់ពី "ដំណើរផ្សងព្រេង" របស់យោធាលោកខាងលិចនៅមជ្ឈិមបូព៌ា។ នៅក្នុងការបង្ហាញការគាំទ្រសម្រាប់បេឡារុស្ស រុស្ស៊ីបានបញ្ជូនយន្តហោះទម្លាក់គ្រាប់បែកយុទ្ធសាស្ត្រទៅល្បាតលើប្រទេសបេឡារុស្សក្នុងសប្តាហ៍នេះ ហើយថ្ងៃនេះ ប្រទេសទាំងពីរបាននិយាយថា កងវរសេនាតូចទ័ពឆ័ត្រយោងរួមគ្នាមួយ កំពុងធ្វើសមយុទ្ធបាញ់ប្រហារនៅជិតព្រំដែនប៉ូឡូញ។

ភាពតានតឹងកាន់តែខ្លាំងឡើងរវាងទីក្រុងមូស្គូ និងលោកខាងលិចជុំវិញបញ្ហាអ៊ុយក្រែន ជាមួយនឹងមេដឹកនាំសហរដ្ឋអាមេរិក និងសហភាពអឺរ៉ុបក្នុងរយៈពេលប៉ុន្មានថ្ងៃថ្មីៗនេះ បានធ្វើឱ្យមានការព្រួយបារម្ភអំពីចលនាទាហានរុស្ស៊ី ដែលត្រូវបានរាយការណ៍នៅជិតព្រំដែនអ៊ុយក្រែន។

យោងតាមកាសែតប៉ូឡូញ Gazeta Wyborcza បានឱ្យដឹងថា យ៉ាងហោចណាស់មានជនចំណាកស្រុកចំនួន 10 នាក់បានស្លាប់នៅតាមព្រំដែនក្នុងប៉ុន្មានខែថ្មីៗនេះ ដែលក្នុងនោះមាន 7 នាក់នៅខាងប៉ូឡូញ។

វាមិនច្បាស់ទេថា តើមានជនចំណាកស្រុកប៉ុន្មាននាក់ឥឡូវនេះនៅក្នុងប្រទេសបេឡារុស្ស ប៉ុន្តែរាប់ពាន់នាក់បានឆ្លង ឬព្យាយាមឆ្លងពីប្រទេសនេះចូលទៅក្នុងរដ្ឋសហភាពអឺរ៉ុបភាគខាងកើតនៃប្រទេសឡាតវី លីទុយអានី និងប៉ូឡូញចាប់តាំងពីរដូវក្តៅ៕

Khcct banner

អត្ថបទទាក់ទង