ភ្នំពេញ៖ កិច្ចប្រជុំកំពូលអាស៊ី-អឺរ៉ុប (ASEM) លើកទី១៣ ដែលកម្ពុជាគ្រោងធ្វើជាម្ចាស់ផ្ទះនៅតែដំណើរការធម្មតា ប្រសិនបើពិភពលោកគ្រប់គ្រងស្ថានការណ៍ជំងឺកូវីដ១៩បាន ខណៈកិច្ចប្រជុំកំពូលអាស៊ី-អឺរ៉ុប លើកទី១៣នេះ ដែលគ្រោងនឹងប្រព្រឹត្តិទៅនៅថ្ងៃទី១៦-១៧ ខែវិច្ឆិកា ឆ្នាំ២០២០។ នេះបើតាមការអះអាងរបស់មន្ត្រីរបស់ក្រសួងការបរទេស។
លោក លុយ ដាវីត រដ្ឋលេខាធិការ និងសហប្រតិបត្តិការអន្តរជាតិ និងជាប្រធានលេខាធិការដ្ឋានជាតិរៀបចំកិច្ចប្រជុំកំពូលអាស៊ី-អឺរ៉ុប (ASEM)លើកទី១៣ បានមានប្រសាសន៍ថា កម្ពុជាបានរៀបចំនូវកិច្ចប្រជុំតាមប្រព័ន្ធវីដេអូ (Video Conference) ជាមួយបណ្តាប្រទេសដែលមានប្រទេសតំណាងឲ្យអាស៊ាន សហភាពអ៊ឺរ៉ុប(EU) និងមានតំណាងប្រទេសផ្សេងទៀត ផ្លាស់ប្ដូរមតិយោបល់អំពីកិច្ចប្រជុំកំពូលអាស៊ី-អឺរ៉ុប ដើម្បីធ្វើយ៉ាងណាឲ្យកិច្ចប្រជុំនេះដំណើរការទៅមុខ។
បើតាមលោក លុយ ដាវីត មិនមែនចំពោះតែកិច្ចប្រជុំកំពូលអាស៊ី-អឺរ៉ុប (ASEM) ប៉ុណ្ណោះទេ កិច្ចប្រជុំនៃព្រឹត្តិការណ៍អមដទៃទៀតនៅតែដំណើរការជាធម្មតា ប្រសិនបើពិភពលោកអាច គ្រប់គ្រងស្ថានការណ៍អំពីបញ្ហានៃជំងឺកូវីដ១៩នេះបាន។
គួរបញ្ជាក់ថា កម្ពុជាបានក្លាយជាសមាជិក នៃកិច្ចប្រជុំកំពូលអាស៊ី-អឺរ៉ុប នៅឆ្នាំ២០០៤ និងត្រូវបានផ្តល់សេចក្តីទុកចិត្តឱ្យធ្វើជាម្ចាស់ផ្ទះ នៃកិច្ចប្រជុំកំពូលអាស៊ី-អឺរ៉ុប លើកទី១៣នេះ ក្រោមប្រធានបទ៖ “ការពង្រឹងពហុភាគីនិយម ដើម្បីកំណើនរួម” ដោយនឹងមានការចូលរួមពីសំណាក់ថ្នាក់ដឹកនាំកំពូល នៃប្រទេសនៅតំបន់អឺរ៉ុប និងអាស៊ី លេខាធិការដ្ឋានអាស៊ាន និងសហភាពអឺរ៉ុបចំនួន ៥៣ប្រទេសនិងដៃគូ។នេះបើតាមការចុះផ្សាយរបស់ក្រសួងព័ត៌មាន។
