ភ្នំពេញ៖ អ្នកនាំពាក្យក្រសួងពាណិជ្ជកម្មកម្ពុជា លោកសៀង ថៃ បានលើកឡើងឱ្យដឹងនៅរសៀលថ្ងៃចន្ទនេះថា បើបញ្ហាកង្វះវត្ថុធាតុដើមពីប្រទេសចិននៅតែអូសបន្លាយពេល នោះផលិតកម្មសម្លៀកបំពាក់នៅក្នុងស្រុកនឹងថយចុះ។ ដូច្នេះហើយ ការនាំចេញរបស់កម្ពុជាលើផ្នែកសម្លៀកបំពាក់នេះ ក៏នឹងមានការថយចុះតាមហ្នឹងផងដែរ។
ការអះអាងរបស់អ្នកនាំពាក្យក្រសួងពាណិជ្ជកម្មនេះ ធ្វើឡើងបន្ទាប់ពីក្រសួងការងារបានប្រកាសឱ្យដឹងថា រោងចក្រចន្លោះពី១០ ទៅ១៥ កំពុងពិចារណាសុំព្យួរកិច្ចសន្យាការងារមួយរយៈដោយសារតែខ្វះ«វត្ថុធាតុដើម»ដើម្បីដំណើរការសង្វាក់ផលិតកម្មរបស់ខ្លួន។ កង្វះខាតវត្ថុធាតុដើមនេះ គឺដោយសារតែការរីករាលដាលនៃមេរោគកូរ៉ូណានៅក្នុងប្រទេសចិន ដែលធ្វើឱ្យរោងចក្រផលិតវត្ថុធាតុដើមនៅទីនោះផ្អាកដំណើរការសង្វាក់ផកលិតកម្មរបស់ខ្លួន។
បើទោះបីប្រឈមនឹងបញ្ហានេះ ប៉ុន្តែ លោកសៀង ថៃ បានគូសបញ្ជាក់ថា ដំណោះស្រាយ គឺម្ចាស់រោងចក្រដែលកំពុងជួបបញ្ហាបង្វែរការបញ្ជាទិញវត្ថុធាតុដើមពីប្រទេសផ្សេងក្រៅពីប្រទេសចិន ហើយលោកថា រោងចក្រខ្លះក៏កំពុងធ្វើបែបនេះដែរ។ ក៏ប៉ុន្តែក៏មានរោងចក្រមួយចំនួនបានបញ្ជាទិញវត្ថុធាតុដើមពីចិនក្នុងចំនួនច្រើនដែលអាចត្រៀមដល់រយៈពេលប្រមាណជា៤០ថ្ងៃបន្តទៀត។
បើតាមលោកសៀង ថៃ ដដែល បញ្ហាកង្វះវត្ថុធាតុដើមពីប្រទេសចិន គឺអាស្រ័យទាំងស្រុងលើបញ្ហាមេរោគឆ្លងកូរ៉ូណា ពោល គឺថាបើសិនមេរោគនេះ ត្រូវបានលុបបំបាត់បានក្នុងពេលខ្លី នោះវានឹងមានភាពល្អប្រសើរសម្រាប់រោងចក្រនានានៅកម្ពុជា។ ប៉ុន្តែបើអូសបន្លាយពេលវេលាយូរ នោះវាក៏មានផលប៉ះពាល់យូរតាមនោះដែរ។ តែទោះជាយ៉ាងណា លោកសៀង ថៃ គូសបញ្ជាក់ថា ការផ្អាករោងចក្រ ឫព្យួរការងារកម្មករនាពេលខាងមុខនេះ គឺមកពីបញ្ហាមេរោគកូរ៉ូណា មិនមែនដោយសារតែបញ្ហាប្រព័ន្ធអនុគ្រោះពន្ធEBAនោះទេ។ លោកថា បញ្ហាEBA អាចប៉ះពាល់ប៉ុនណានោះ គឺរង់ចាំមើលនៅថ្ងៃទី១២ កុម្ភៈខាងមុខនេះសិន៕