កាលីហ្វ័រញ៉ា៖ អ្នកពន្លត់អគ្គីភ័យជាង ១.៦០០ នាក់កំពុងប្រយុទ្ធប្រឆាំងនឹងការឆាបឆេះទាំងផ្លូវគោកនិងតាមអាកាសនៅលើភ្នំ Santa Ynez ភាគខាងលិចទីក្រុង Santa Barbara។ មន្រ្តីសហព័ន្ធបាននិយាយថា ពួកគេអាចបញ្ឈប់ការរាលដាលនៃភ្លើងឆេះបាន ៧៨% ។
ភ្លើងអាលីសាល់ (Alisal Fire) បានចាប់ផ្តើមកាលពីថ្ងៃចន្ទសប្តាហ៍មុន និងឆាបឆេះជិត ២៧ ម៉ាយ (៦៩ គីឡូម៉ែត្រការ៉េ) ហើយបាននឹងកំពុងគំរាមកំហែងដល់រចនាសម្ព័ន្ធប្រហែល ៤០០។
អណ្តាតភ្លើងទំហំ ០.៦ ហិកតា ដែលបានឆាបឆេះ ត្រូវបានពន្លត់ដោយក្រុមអ្នកពន្លត់អគ្គីភ័យ ដែលបានប្រើម៉ាស៊ីនរុញ ខ្សែបាញ់ទឹកអូសដោយដៃ និងការពន្លត់ពីលើអាកាស។ កាលពីថ្ងៃអាទិត្យចំណុចក្តៅមួយចំនួននៅតែមាន ហើយក្រុមពន្លត់អគ្គិភ័យបានផ្តោតលើការបង្កើនការទប់ស្កាត់។
មន្ត្រីបាននិយាយថា សីតុណ្ហភាពត្រជាក់ជាងនេះសម្រាប់ថ្ងៃអាទិត្យ ប៉ុន្តែខ្យល់ដែលមានល្បឿនប្រហែល ២០ ម៉ាយក្នុងមួយម៉ោង (៣២ គីឡូម៉ែត្រក្នុងមួយម៉ោង) នៅតែត្រូវបានរំពឹងទុកនៅក្នុងតំបន់នេះ។
ភ្លើងឆេះព្រៃនៅរដ្ឋកាលីហ្វ័រញ៉ាបានឆាបឆេះជិត ៣.៩០០ ម៉ាយ (១០.១០១ គីឡូម៉ែត្រការ៉េ) បំផ្លាញផ្ទះជាង ៣.៦០០ ផ្ទះអាជីវកម្ម និងសំណង់ផ្សេងៗទៀតនៅឆ្នាំនេះ។ នេះបើយោងតាមនាយកដ្ឋានព្រៃឈើនិងការការពារភ្លើងរដ្ឋ។
គ្រោះរាំងស្ងួតជាប្រវត្តិសាស្ត្រនៅភាគខាងលិចអាមេរិក ដែលជាប់ទាក់ទងនឹងការប្រែប្រួលអាកាសធាតុកំពុងធ្វើឱ្យភ្លើងឆេះព្រៃកាន់តែពិបាកធ្វើការពន្លត់។ វាបានសម្លាប់ដើមឈើរាប់លានដើមនៅរដ្ឋកាលីហ្វ័រញ៉ាតែមួយ។ អ្នកវិទ្យាសាស្ត្រនិយាយថា ការប្រែប្រួលអាកាសធាតុបានធ្វើឱ្យប្រទេសលោកខាងលិចក្តៅនិងស្ងួតជាងមុនក្នុងរយៈពេល ៣០ ឆ្នាំចុងក្រោយនេះ ហើយនឹងបន្តធ្វើឱ្យអាកាសធាតុកាន់តែធ្ងន់ធ្ងរដោយមានភ្លើងឆេះព្រៃកាន់តែញឹកញាប់៕
