នាយករដ្ឋមន្រ្តីថៃធ្វើចត្តាឡីស័កបន្ទាប់ពីថតរូបSelfieជាមួយមេដឹកនាំអាជីវកម្មវិជ្ជមានកូវីដ១៩

ថៃ៖ លោកនាយករដ្ឋមន្រ្តី Prayut Chan-o-cha បានធ្វើចត្តាឡីស័ក ចាប់តាំងពីលោកបានត្រឡប់មកពីភូកេតជាកន្លែងដែលលោកបានថតរូបជាមួយមេដឹកនាំជំនួញដែលក្រោយមកបានធ្វើតេស្តវិជ្ជមាន Covid-19 ។នេះបើយោងតាមសារព័ត៌មានThe Nation Thailand។

នាយករដ្ឋមន្រ្តីថៃត្រូវបានធ្វើចត្តាឡីស័ក បន្ទាប់ពីរូបថត Selfie មួយដែលត្រូវបានបង្ហោះដោយលោក Veerasak Pisanuwong ប្រធានសភាពាណិជ្ជកម្មសូរិន្ទក្នុងពិធីបើក "ប្រអប់ខ្សាច់" នៅភូកេតកាលពីថ្ងៃទី ១ ខែកក្កដា។

លោក Veerasak បានប្រកាសកាលពីថ្ងៃអាទិត្យថា គាត់បានធ្វើតេស្តិ៍នៅមន្ទីរពេទ្យសុរិន្ទនៅពេលព្រឹកហើយលទ្ធផលវិជ្ជមានកូវីដ១៩នៅម៉ោង ៤.៣០ រសៀល។ បន្ទាប់មកគាត់ត្រូវបានគេបញ្ជូនទៅមន្ទីរពេទ្យដើម្បីព្យាបាល។

អ្នកនាំពាក្យរដ្ឋាភិបាលលោក Anucha Burapachaisri បាននិយាយនៅថ្ងៃច័ន្ទនេះថា លោកប្រាយុទ្ធនឹងបន្តបំពេញភារកិច្ចរបស់គាត់ពីផ្ទះនិងត្រួតពិនិត្យស្ថានភាព Covid-19 យ៉ាងដិតដល់។

លោកបានមានប្រសាសន៍ថា លោកនាយករដ្ឋមន្រ្តីក៏បានស្នើឲ្យពលរដ្ឋប្រកាន់ខ្ជាប់យ៉ាងម៉ឺងម៉ាត់នូវការអនុវត្តរបស់ DMHTTដូចជា រក្សាគម្លាត ពាក់ម៉ាស់ លាងដៃ ការធ្វើតេស្ត និងការពិនិត្យពេលចូលទៅ ThaiChana ទោះបីពួកគេបានចាក់វ៉ាក់សាំងហើយក៏ដោយ៕