ភ្នំពេញ៖សម្តេចនាយករដ្ឋមន្រ្តីហ៊ុន សែន បានបញ្ជាឱ្យបិទកាស៊ីណូទាំងអស់នៅទូទាំងប្រទេសកម្ពុជាចាប់ពីថ្ងៃទី១ ខែមេសា ខាងមុខនេះតទៅ។ បទបញ្ជារបស់សម្តេចហ៊ុន សែននេះ ធ្វើឡើងនៅក្នុងសន្និសីទសារព័ត៌មានពិសេសមួយនៅវិមានរដ្ឋសភាជាតិនៅព្រឹកថ្ងៃទី៣០ ខែមីនា ឆ្នាំ២០២០នេះ។
សម្តេចហ៊ុន សែន បានអះអាងថា កាស៊ីណូក៏អាចជាកន្លែងមួយដែលនាំឱ្យមានការឆ្លងរីករាលដាលនៃជំងឺកូវីដ-១៩ផងដែរ ដូច្នេះហើយ ម្ចាស់កាស៊ីណូទាំងអស់ត្រូវបិទបណ្តោះអាសន្នសិនហើយនឹងត្រូវអនុញ្ញាតឱ្យបើកឡើងវិញនៅពេលវេលាសមរម្យណាមួយនាពេលខាងមុខ។ សម្តេចនាយរកដ្ឋមន្រ្តីហ៊ុន សែន បានពន្យល់ថា មិនអាចបញ្ជាឱ្យបិទភ្លាមៗបានទេ ខ្លាចក្រែងម្ចាស់កាស៊ីណូរត់ទៅបាត់អត់មានអ្នកណាដោះស្រាយជាមួយបុគ្គលិកនៅក្នុងរយៈពេលត្រូវបិទបណ្តោះអាសន្ននេះ។
ជាមួយគ្នានេះ សម្តេចហ៊ុន សែន ក៏បានបញ្ជាឱ្យក្រសួងសេដ្ឋកិច្ច និងហិរញ្ញវត្ថុធ្វើការជាមួយម្ចាស់កាស៊ីណូទាំងអស់លើបញ្ជានេះ ដោយសម្តេចឱ្យគិតគូរកុំឱ្យម្ចាស់កាស៊ីណូបង់កាតព្វកិច្ចប្រាក់ចំណូល ព្រោះថា ពួកគេមិនអាចរកចំណូលបាននៅក្នុងអំឡុងពេលបិទទ្វារនោះទេ។
សូមបញ្ជាក់ថា គិតមកដល់ពេលនេះ កាស៊ីណូនៅទូទាំងប្រទេសកម្ពុជាមានចំនួនសរុបប្រមាណ១៣៦កន្លែង។ វិស័យកាស៊ីណូនេះ កម្ពុជាអាចកៀរគរចំណូលពីវិស័យកាស៊ីណូឱ្យបានជាង៥៦លានដុល្លារក្នុងឆ្នាំ២០១៩។ ចំណែក នៅក្នុងឆ្នាំ២០១៨វិញ កម្ពុជាបានប្រមូលប្រាក់ចំណូលពីវិស័យកាស៊ីណូប្រមាណ ៤៦លានដុល្លារអាមេរិក៕
