ភ្នំពេញ៖ ក្រសួងសុខាភិបាលកម្ពុជា នៅថ្ងៃទី២៦ ខែមេសា ឆ្នាំ២០២១ នេះ បានចេញសេចក្តីប្រកាសព័ត៌មានពីការរកឃើញអ្នកឆ្លងជំងឺកូវីដ-១៩ ថ្មី ក្នុងថ្ងៃទី២៥ ខែមេសា នេះ មានចំនួន ៥៨០នាក់បន្ថែមទៀត ក្នុងនោះមាន ៥៧៩នាក់ជាប់ពាក់ព័ន្ធនឹង «ព្រឹត្តិការណ៍សហគមន៍២០កុម្ភៈ» និងអ្នកជាសះស្បើយចំនួន ១៧៧នាក់ផងដែរ។
ក្នុងចំណោមអ្នកឆ្លងកូវីដថ្មីទាំង ៥៨០នាក់ខាងលើ មានម្នាក់ជាពលករខ្មែរមកពីប្រទេសថៃ និង ៥៧៩នាក់ទៀត ជាករណីឆ្លងក្នុង«ព្រឹត្តិការណ៍សហគមន៍២០កុម្ភៈ» នៅរាជធានីភ្នំពេញមានអ្នកឆ្លងកូវីដចំនួនច្រើនជាងគេ មានចំនួនអ្នកឆ្លងរហូតទៅដល់ ៣៣៧នាក់ ហើយខេត្តព្រះសីហនុ ៩១នាក់, ខេត្តបន្ទាយមានជ័យ ៩១នាក់ , ខេត្តកណ្ដាល ៥១នាក់, ខេត្តព្រៃវែង ០២នាក់ , ខេត្តត្បូងឃ្មុំ ០១នាក់, ខេត្តកែប ០១នាក់, ខេត្តស្វាយរៀង ០១នាក់, ខេត្តកំពង់ឆ្នាំង ០១នាក់, ខេត្តកំពង់ធំ ០២នាក់ និងខេត្តកំពង់ស្ពឺ ០១នាក់។
គួរបញ្ជាក់ថា គិតត្រឹមព្រឹកម៉ោង៧ និង០០នាទី ថ្ងៃទី២៦ ខែមេសា ឆ្នាំ២០២១នេះ កម្ពុជាបានរកឃើញអ្នកឆ្លងជំងឺកូវីដសរុបចំនួន ១០៥៥៥នាក់ ជាសះស្បើយចំនួន ៣៥៧៧នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន ៦៨៩២នាក់ ហើយករណីស្លាប់ ៧៩នាក់៕
