បន្ទាយមានជ័យ៖ឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្រ្តី ប្រធានក្រុមការងាររដ្ឋាភិបាលចុះមូលដ្ឋានខេត្តបន្ទាយមានជ័យ កំពុងមានជំងឺដែលអាចត្រូវវះកាត់។នេះបើតាមការបញ្ជាក់ពីសម្តេចហ៊ុន សែន នាយករដ្ឋមន្ត្រីនៃកម្ពុជាក្នុងពេលសម្តេចចុះចែកជំនួយជូនដល់ប្រជាពលរដ្ឋនៅថ្ងៃទី ២១ តុលានេះ។
សម្ដេច ហ៊ុន សែន ស្រាយចម្ងល់អំពីអវត្តមានឯកឧត្តមឧបនាយករដ្ឋមន្ត្រី កែ គឹមយ៉ាន ពេលពលរដ្ឋនៅបន្ទាយមានជ័យជួបគ្រោះទឹកជំនន់ ដោយសម្តេចអះអាងថា ឯកឧត្តម នាយឧត្តមសេនីយ៍ កែ គឹមយ៉ាន កំពុងព្យាបាលជំងឺនៅឯក្រៅប្រទេស។សម្តេចសុំការយោគយល់ចំពោះអវត្តមានឯកឧត្តម នាយឧត្តមសេនីយ៍ កែ គឹមយ៉ានផងដែរ។
សម្ដេចបានថ្លែងថា " សូមបងប្អូនមេត្តាយោគយល់ចំពោះគាត់។ នៅពេលនេះគាត់កំពុងព្យាបាលជំងឺនៅឯក្រៅប្រទេស។ គាត់វាយ(សារ)មកខ្ញុំថាសម្ដេច! ព្រឹត្តិការណ៍របៀបនេះតើខ្ញុំវិលវិញឬយ៉ាងម៉េច? បានខ្ញុំឆ្លើយតបទៅវិញថា សុខភាពសំខាន់ជាង! ត្រូវព្យាបាលសិន"។
បើតាមសម្តេចហ៊ុន សែន បច្ចុប្បន្នឯកឧត្តម កែ គឹមយ៉ាន កំពុងធញវើចត្តាឡីស័ក១៥ថ្ងៃ ទើបបានចូលព្យាបាល ហើយទើបតែរកឃើញជំងឺប្រភេទណាដែលគេត្រូវព្យាបាល។សម្រាប់សម្តេចឯកឧត្តម កែ គឹមយ៉ានចង់វិលត្រឡប់មកដោះស្រាយនៅហ្នឹងខេត្តបន្ទាយមានជ័យណាស់។ ក៏ប៉ុន្តែដោយសារតែជំងឺរបស់គាត់។ហើយឯកឧត្តម កែ គឹមយ៉ាន មិនដែលចោលខេត្តបន្ទាយមានជ័យទេ។
យ៉ាងណាក៏ដោយ សម្តេចហ៊ុន សែន មិនបានបញ្ជាក់លំអិតថា ឯកឧត្តម នាយឧត្តមសេនីយ៍ កែ គឹមយ៉ាន មានជំងឺអ្វី ហើយកំពុងព្យាបាលនៅប្រទេសណានោះទេ។គ្រាន់តែបញ្ជាក់យ៉ាងខ្លីថា ឯកឧត្តម នាយឧត្តមសេនីយ៍ កែ គឹមយ៉ានអាចត្រូវវះកាត់។
ឯកឧត្តម នាយឧត្តមសេនីយ៍ កែ គឹមយ៉ាន ជាអតីតអគ្គមេបញ្ជាការនៃកងយោធពលខេមរភូមិន្ទ ហើយក្រោយមកឯកឧត្តមត្រូវបានតែងតាំងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន។
