ភ្នំពេញ៖ ក្រសួងទេសចរណ៍នៅថ្ងៃទី១៨ ខែកក្កដា ឆ្នាំ២០២២នេះ បានបង្ហាញស្ថិតិប្រចាំសប្តាហ៍ថ្ងៃទី១៦-១៧ ខែកក្កដា ឆ្នាំ២០២២ អំពីភ្ញៀវទេសចរចេញដើរកម្សាន្តនៅទូទាំងប្រទេសកម្ពុជា ដែលមានចំនួន ២២៦,៤៤១ នាក់ ក្នុងនោះភ្ញៀវជាតិ ២០៤,៤៨១នាក់ ភ្ញៀវបរទេសផ្ទៃក្នុង ២១,៩៦០នាក់។
បើតាមរបាយការណ៍ ក្រសួងបញ្ជាក់ថា តួលេខខាងលើមានការថយចុះប្រមាណ ២០.៧៧% ធៀបនឹងសប្តាហ៍កន្លងមក ហើយគោលដៅទេសចរណ៍សំខាន់ៗ សុទ្ធតែ មានថយចុះដូចជា៖ ខេត្តព្រះសីហនុ ថយចុះប្រមាណ ៤៨.០៧%, ខេត្តកែប ថយចុះប្រមាណ ៤១.៧២% និងខេត្តសៀមរាប ថយចុះប្រមាណ ៣៨.០៦%។
ក្រសួងបានឱ្យដឹងថា មូលហេតុសំខាន់ដែលនាំឲ្យការថយនៃចំនួនភ្ញៀវទេសចរនាសប្តាហ៍កន្លងមក បណ្តាលមកពីបញ្ហាអាកាសធាតុដែលមិនអំណោយផល មានភ្លៀងធ្លាក់ច្រើននៅគ្រប់រាជធានីខេត្ត ដែលបានធ្វើឲ្យមានជំនន់ទឹកភ្លៀងនៅតាមតំបន់មួយចំនួន ពិសេសគោលដៅទេសចរណ៍ខេត្តតំបន់ឆ្នេរ និងគោលដៅទេសចរណ៍នៅខេត្តពោធិ៍សាត់ (តំបន់វាលវែង និងផ្លូវបុប្ផាលក់ខ្លួន ( ផ្លូវជាតិលេខ៥៥ )ជាដើម។
គោលដៅទេសចរណ៍សំខាន់ៗ រួមមាន៖ ខេត្តបាត់ដំបង ៣៦.៥២០ នាក់, ខេត្តកំពត ២៨.៩៦៤ នាក់ខេត្តព្រះសីហនុ ២៨.៥០៤ នាក់, ខេត្តសៀមរាប ២៧.៥៨៦ នាក់, រាជធានីភ្នំពេញ ២០.៨១៦ នាក់,ខេត្តកែប ១០.៥៣១ នាក់, ខេត្តកណ្តាល ១០.២៨៦ នាក់ និងខេត្តពោធិ៍សាត់ ១០.២៨២ នាក់។ នេះបើតាមរបាយការណ៍៕
