ភ្នំពេញ៖ ឆ្លើយតបនឹងសំណួររបស់វិទ្យុមិត្តភាពកម្ពុជា-ចិន នាពេលថ្មីៗនេះ ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសនិងសហប្រតិបត្តិការអន្តរជាតិនៃប្រទេសកម្ពុជាបានមានប្រសាសន៍ ថា កម្ពុជាគាំទ្រ «គំនិតផ្តួចផ្តើមអភិវឌ្ឍន៍សកល» ដែលត្រូវបានស្នើឡើងដោយប្រធានរដ្ឋចិន ឯកឧត្តម Xi Jinping ។ ឯកឧត្តមយល់ឃើញថា គំនិតផ្តួចផ្តើមអភិវឌ្ឍន៍សកល គឺជាផលប្រយោជន៍សាធារណៈមួយផ្សេងទៀត ដែលចិនផ្តល់ដល់ពិភពលោកទាំងមូល។
ឯកឧត្តមជឿជាក់យ៉ាងមុតមាំថា ការចូលរួមរបស់កម្ពុជា ក្នុងគំនិតផ្តួចផ្តើមនេះនឹងពង្រឹងបន្ថែមទៀត នូវក្របខ័ណ្ឌកិច្ចសហប្រតិបត្តិការដែលមានស្រាប់គួរឱ្យកត់សម្គាល់ ក្នុងនោះ មានដូចជា គំនិតផ្តួចផ្តើមខ្សែក្រវាត់ និងផ្លូវ (BRI) និងការកសាងសហគមន៍កម្ពុជា-ចិន នៃអនាគតរួមគ្នា ជាដើម។
ឯកឧត្តម ឧបនាយករដ្ឋមន្ត្រី ប្រាក់ សុខុន ក៏បានរម្លឹកពី «គំនិតផ្តួចផ្តើមអភិវឌ្ឍន៍សកល» ដែលត្រូវប្រកាសដាក់ចេញដោយប្រធានរដ្ឋចិន ឯកឧត្តម Xi Jinping នៅក្នុងសម័យប្រជុំលើកទី ៧៦ នៃមហាសន្និបាតអង្គការសហប្រជាជាតិនៅខែកញ្ញា ឆ្នាំ ២០២១ ដោយពេលនោះ ត្រូវបានស្វាគមន៍យ៉ាងកក់ក្តៅពីសហគមន៍អន្តរជាតិ ជាពិសេស ប្រទេសកំពុងអភិវឌ្ឍន៍។ នេះគឺដោយសារតែ គំនិតផ្តួចផ្តើមអភិវឌ្ឍន៍សកល មានគោលបំណងជួយដល់ប្រទេសអភិវឌ្ឍន៍តិចតួច ជាពិសេស អ្នកដែលជួបការលំបាកក្នុងការងើបឡើងវិញពីជំងឺរាតត្បាត COVID-19 កាត់បន្ថយភាពក្រីក្រ និងសន្តិសុខស្បៀង តាមរយៈកិច្ចសហប្រតិបត្តិការអន្តរជាតិ និងការលើកកម្ពស់ការអភិវឌ្ឍ ផ្នែកហិរញ្ញវត្ថុ និងបៃតង។
«ជាការពិតណាស់ គំនិតផ្តួចផ្តើមអភិវឌ្ឍន៍សកល គឺជាផលប្រយោជន៍សាធារណៈមួយផ្សេងទៀតដែលប្រទេសចិនផ្តល់ដល់ពិភពលោកទាំងមូល។ គំនិតផ្តួចផ្តើមអភិវឌ្ឍន៍សកល នឹងចូលរួមចំណែកក្នុងការពង្រឹងកិច្ចសហប្រតិបត្តិការអភិវឌ្ឍន៍អន្តរជាតិ និងការពន្លឿនការអនុវត្តគោលដៅអភិវឌ្ឍន៍ប្រកបដោយចីរភាព ឆ្នាំ ២០៣០។
ឯកឧត្តម ឧបនាយករដ្ឋមន្ត្រី ប្រាក់ សុខុន បានបន្តថា ជាងនេះទៅទៀត គំនិតផ្តួចផ្តើមនេះ រំលឹកឲ្យឃើញថា ប្រទេសនីមួយៗចង់បានការអភិវឌ្ឍន៍ និងការរីកចម្រើន ដូច្នេះ កិច្ចសហប្រតិបត្តិការ ជំនួសឱ្យការប្រកួតប្រជែង និងការបែងចែកតិចជាង៕
