ព្យុងយ៉ាង៖ មេដឹកនាំកូរ៉េខាងជើងលោក គីម ជុងអ៊ុន បានដឹកនាំកិច្ចប្រជុំការិយាល័យនយោបាយបន្ទាន់មួយ និង បានបញ្ជាឱ្យប្រើប្រាស់យោធា ដើម្បីរក្សាស្ថិរភាពការផ្គត់ផ្គង់ថ្នាំកូវីដ១៩ក្នុងទីក្រុងព្យុងយ៉ាង ខណៈដែលប្រទេសនេះកំពុងប្រយុទ្ធប្រឆាំងនឹងការផ្ទុះឡើងនៃ កូវីដ១៩ ដែលបានបញ្ជាក់ជាលើកដំបូងរបស់ខ្លួន។ការប្រកាសរបស់មេដឹកនាំកូរ៉េខាងជើងនេះធ្វើឡើងបន្ទាប់ពីមេរោគកូវីដ១៩កំពុងតែវាយលុកកូរ៉េខាងជើងរហូតដល់បង្ខំមេដឹកនាំផ្តាច់ការរូបនេះឲ្យបិទប្រទេសដើម្បីធ្វើការប្រយុទ្ធជាមួយមេរោគកូវីដ១៩។
ភ្នាក់ងារសារព័ត៌មានរដ្ឋ KCNA កូរ៉េខាងជើងបានឲ្យដឹងថា កូរ៉េខាងជើងបានទទួលស្គាល់ជាលើកដំបូងកាលពីសប្តាហ៍មុនថាខ្លួនកំពុងប្រយុទ្ធប្រឆាំងនឹងការផ្ទុះឡើងនៃ កូវីដ១៩ ដោយអ្នកជំនាញបានលើកឡើងពីការព្រួយបារម្ភថាវីរុសនេះអាចបំផ្លិចបំផ្លាញប្រទេសកូរ៉េខាងជើងបានយ៉ាងឆាប់រហ័សដោយសារតែកូរ៉េខាងជើងជាប្រទេសឯកកោនិងពុំមានថ្មាំព្យាបាលកូវីដ១៩គ្រប់គ្រាន់ ព្រមទាំងវេជ្ជសាស្រ្តពេទ្យនៅមានកម្រិត។
បើតាមទីភ្នាក់ងារសារព័ត៌មានរដ្ឋ KCNA បានរាយការណ៍ថា នៅក្នុងកិច្ចប្រជុំបន្ទាន់នៃការិយាល័យនយោបាយដែលបានធ្វើឡើងកាលពីថ្ងៃអាទិត្យ លោក Kim បានរិះគន់អាកប្បកិរិយាការងារ "គ្មានការទទួលខុសត្រូវ" និងការរៀបចំ និងការអនុវត្តសមត្ថភាពរបស់គណៈរដ្ឋមន្ត្រី និងផ្នែកសុខភាពសាធារណៈ។
របាយការណ៍បាននិយាយថា រដ្ឋាភិបាលបានបញ្ជាឱ្យចែកចាយទុនបំរុងឱសថជាតិរបស់ខ្លួន ប៉ុន្តែលោក Kim បាននិយាយថា ថ្នាំដែលទិញដោយរដ្ឋមិនបានទៅដល់ប្រជាជនទាន់ពេលវេលា និងត្រឹមត្រូវតាមឱសថស្ថាននោះទេ។ លោកគីមបានបញ្ជាឱ្យ "កងកម្លាំងដ៏មានអំណាច" នៃកងពេទ្យរបស់កងទ័ពត្រូវដាក់ពង្រាយដើម្បី "ធ្វើឱ្យមានស្ថិរភាពការផ្គត់ផ្គង់ថ្នាំភ្លាមៗនៅក្នុងទីក្រុងព្យុងយ៉ាង"។ KCNA ក៏បានរាយការណ៍ផងដែរថា លោក Kim បានទៅទស្សនកិច្ចឱសថស្ថានដែលមានទីតាំងនៅជិតទន្លេ Taedong ក្នុងទីក្រុងព្យុងយ៉ាង ដើម្បីស្វែងយល់អំពីការផ្គត់ផ្គង់ និងការលក់ថ្នាំ។
លោក Kim បាននិយាយថា ឱសថស្ថានមិនមានឧបករណ៍គ្រប់គ្រាន់ដើម្បីបំពេញមុខងាររបស់ពួកគេដោយរលូន មិនមានកន្លែងស្តុកថ្នាំគ្រប់គ្រាន់ ក្រៅពីកន្លែងតាំងបង្ហាញ ហើយអ្នកលក់ក៏មិនមានបំពាក់នូវសម្លៀកបំពាក់អនាម័យត្រឹមត្រូវ។ ប្រទេសកូរ៉េខាងជើងបាននិយាយថា "សមាមាត្រដ៏ច្រើន" នៃការស្លាប់រហូតមកដល់ពេលនេះ គឺដោយសារតែមនុស្ស "ធ្វេសប្រហែសក្នុងការប្រើថ្នាំ ដោយសារកង្វះចំណេះដឹង និងការយល់ដឹងអំពីមេរោគបំបាំងកាយ អូមីក្រុង និងវិធីព្យាបាលត្រឹមត្រូវរបស់វា៕
