អ៊ីស្រាអែល៖ អ៊ីស្រាអែលកាលពីថ្ងៃទី១៨ ខែមេសា បានស្ទាក់ចាប់គ្រាប់រ៉ុក្កែតមួយគ្រាប់ ដែលបានបាញ់ចេញពីតំបន់ហ្គាហ្សា ឆ្ពោះទៅកាន់ប្រទេសអ៊ីស្រាអែល។ នេះជាលើកទីមួយក្នុងឆ្នាំនេះ ដែលអ៊ីស្រាអែលត្រូវបានវាយប្រហារដោយគ្រាប់រ៉ុក្កែតចេញពីតំបន់ហ្គាហ្សា។
អ៊ីស្រាអែលបានបើកការវាយប្រហារផ្លូវអាកាសភ្លាមៗទៅលើតំបន់ ហ្គាហ្សាស្ទ្រីប រហូតដល់ព្រលឹមនៃថ្ងៃបន្ទាប់។ ក្នុងរយៈពេលប៉ុន្មានថ្ងៃកន្លងមកនេះ ភាពតានតឹងរវាងប៉ាឡេស្ទីន និងអ៊ីស្រាអែលកាន់តែតានតឹងឡើង។
យោធាអ៊ីស្រាអែលបាននិយាយថា គ្រាប់រ៉ុក្កែតមួយគ្រាប់ត្រូវបានបាញ់ចេញពីតំបន់ ហ្គាហ្សាស្ទ្រីប ឆ្ពោះទៅកាន់ប្រទេសអ៊ីស្រាអែលកាលពីថ្ងៃទី ១៨ ហើយត្រូវបានស្ទាក់ចាប់ និងបាញ់ទម្លាក់ដោយប្រព័ន្ធការពារដែនអាកាស "Iron Dome" របស់អ៊ីស្រាអែល ប៉ុន្តែមិនទាន់មានសេចក្តីរាយការណ៍ថាមានអ្នកស្លាប់និងរបួសនៅឡើយទេ។
មិនទាន់មានក្រុមណាបានទទួលស្គាល់ថាបានបាញ់គ្រាប់រ៉ុក្កែតនោះទេ ប៉ុន្តែអ៊ីស្រាអែលជឿថា គ្រាប់រ៉ុក្កែតបែបនេះត្រូវបានបាញ់ដោយចលនាតស៊ូអ៊ីស្លាមប៉ាឡេស្ទីន (ហាម៉ាស) ហើយជាធម្មតាត្រូវបានសងសឹកដោយការវាយប្រហារតាមអាកាសលើតំបន់ហ្គាហ្សាស្ទ្រីប។
ប៉ុន្មានម៉ោងមុនពេលគ្រាប់រ៉ុក្កែតត្រូវបានបាញ់ មេដឹកនាំក្រុមហាម៉ាស់បានចេញការព្រមានខ្លីមួយដោយថ្កោលទោសអ៊ីស្រាអែលចំពោះការប៉ះទង្គិចគ្នានៅក្នុង និងជុំវិញវិហារអ៊ីស្លាម al-Aqsa ក្នុងប៉ុន្មានថ្ងៃថ្មីៗនេះ។
យោធាអ៊ីស្រាអែលបាននិយាយកាលពីថ្ងៃទី១៨ថា ក្នុងការសងសឹកចំពោះការវាយប្រហារដោយគ្រាប់រ៉ុក្កែតនេះ កងកម្លាំងការពារអ៊ីស្រាអែលបានបញ្ជូនយន្តហោះចម្បាំង និងការវាយប្រហារតាមអាកាសទៅកាន់ទីតាំងផលិតអាវុធរបស់ក្រុមហាម៉ាសនៅក្នុងតំបន់ហ្គាហ្សាស្ទ្រីប។
សាក្សីបាននិយាយថា អ៊ីស្រាអែលបានធ្វើការវាយប្រហារតាមអាកាសលើគោលដៅនៅភាគខាងត្បូងតំបន់ ហ្គាហ្សាស្ទ្រីប ពីថ្ងៃទី ១៨ ដល់ថ្ងៃទី ១៩។ យុទ្ធជនហាម៉ាសបានបាញ់តបតវិញលើយន្តហោះចម្បាំងអ៊ីស្រាអែល។ ក្រុមហាម៉ាស់បាននិយាយថា កន្លែងទម្លាក់គ្រាប់បែកដោយកងកម្លាំងអ៊ីស្រាអែលគឺ "ទទេ" ហើយថាមិនមានអ្នកស្លាប់និងរបួសទេ។
តាំងពីចុងខែមីនាមក ការវាយប្រហារបានកើតឡើងនៅតំបន់ជាច្រើននៃប្រទេសអ៊ីស្រាអែល។ យោធាអ៊ីស្រាអែលបានប្រើវាជាលេសដើម្បីបើកការវាយឆ្មក់ជាញឹកញាប់និងការប៉ះទង្គិចជាមួយប៉ាឡេស្ទីននៅតំបន់ West Bank។ បាតុកម្មបានផ្ទុះឡើងនៅក្នុងផ្នែកជាច្រើននៃតំបន់ West Bank ដើម្បីតវ៉ាចំពោះការបាញ់សម្លាប់ជនជាតិប៉ាឡេស្ទីនដោយទាហានអ៊ីស្រាអែល។
យោធាអ៊ីស្រាអែលបាននិយាយកាលពីថ្ងៃទី១៨ ថា ខ្លួនបានចាប់ខ្លួនជនជាតិប៉ាឡេស្ទីនសរុប១១នាក់ក្នុងប្រតិបត្តិការប្រឆាំងភេរវករមួយយប់នៅតំបន់ West Bank។ នៅក្នុងការវាយឆ្មក់មួយក្នុងចំណោមការវាយឆ្មក់នៅជិត Jenin យ៉ាងហោចណាស់មនុស្សរាប់សិបនាក់បានគប់ដុំថ្ម និងគ្រឿងផ្ទុះទៅកាន់កងទ័ពអ៊ីស្រាអែល។ ក្រសួងសុខាភិបាលប៉ាឡេស្ទីនបាននិយាយថា បុរសពីរនាក់ត្រូវបានបញ្ជូនទៅមន្ទីរពេទ្យដោយមានរបួសធ្ងន់ធ្ងរ៕
