ចិន៖ ក្នុងមហាសន្និបាតសភាតំណាងប្រជាជនទូទាំងប្រទេសចិនដែលជិតនឹងបើកធ្វើនាពេលដ៏ខ្លីខាងមុខ សភាតំណាងប្រជាជនទូទាំងប្រទេសចិនដែលជាស្ថាប័ននីតិប្បញ្ញត្តិកំពូលរបស់ប្រទេសចិននឹងពិនិត្យពិភាក្សាអំពីសេចក្តីព្រាងក្រមរដ្ឋប្បវេណី ប្រព័ន្ធច្បាប់រដ្ឋប្បវេណីប្រទេសចិននឹងឈានចូលយុគសម័យថ្មីមួយ។ ក្រមរដ្ឋប្បវេណីនឹងក្លាយជាច្បាប់ទី១របស់ចិនដែលដាក់ឈ្មោះជាក្រម ចាប់ពីប្រទេសចិនថ្មីបានបង្កើតឡើងមក ហើយក៏ជាច្បាប់មួយដែលមានមាត្រាច្រើនជាងគេក្នុងចំណោមច្បាប់របស់ប្រទេសចិនផងដែរដែលនឹងក្លាយជាច្បាប់ការពារសិទ្ធិនិងផលប្រយោជន៍គ្រប់ជ្រុងជ្រោយរបស់ប្រជាពលរដ្ឋចិន។
ក្នុងសេចក្តីព្រាងច្បាប់នៃក្រមរដ្ឋប្បវេណីមានការកំណត់ជាច្រើនអំពីការការពារបុគ្គលរដ្ឋប្បវេណីឱ្យទទួលបានសិទ្ធិនិងផលប្រយោជន៍គ្រប់គ្រាន់ផ្នែករដ្ឋប្បវេណី ឧទាហរណ៍ដូចជាបន្ថែមមាត្រាអំពីការគាំពារព័ត៌មានបុគ្គល បង្កើនកម្លាំងការពារទ្រព្យសម្បត្តិសប្បនិម្មិតតាមបណ្តាញអ៊ីនធើណេត និងកំណត់ជាក់លាក់ហាមមិនឱ្យផ្តល់ឥណទានការប្រាក់ខ្ពស់ ជាដើម។
តាមការឧទ្ទេសនាមឱ្យដឹងថា សេចក្តីព្រាងច្បាប់នៃក្រមរដ្ឋប្បវេណីបានផ្សព្វផ្សាយជាសាធារណៈតាមបណ្តាញអ៊ីនធើណេតចំនួន១០លើកជាបន្តបន្ទាប់ដើម្បីសុំមតិយោបល់ពីគ្រប់មជ្ឈដ្ឋានក្នុងសង្គម មានមនុស្សលើសពី៤២ម៉ឺននាក់បានចូលរួមការផ្តល់មតិយោបល់ ដល់ទៅ១លានមតិ។នេះបើយោងតាមការចុះផ្សាយរបស់វិទ្យុមិត្តភាពកម្ពុជា-ចិន៕