ទីក្រុង Donetsk រងការខូចខាតយ៉ាងខ្លាំងដោយសារសង្គ្រាម

អ៊ុយក្រែន៖ ទីក្រុង Donetsk ដែលជាទីក្រុងផ្តាច់ខ្លួនចេញពីប្រទេសអ៊ុយក្រែន រងការខូចខាតយ៉ាងខ្លាំងដោយសាការបាញ់ផ្លោងជាច្រើនថ្ងៃ ខណៈដែលប្រជាពលរដ្ឋនៅក្នុងតំបន់នេះបន្តជ្រកកោន ហើយមិនហ៊ានចេញក្រៅ។

អ្នកស្រុកកំពុងជ្រកកោននៅក្នុងជំរកគ្រាប់បែក ហើយមិនហ៊ានចេញក្រៅ ខណៈរូបភាពវីដេអូពីកន្លែងកើតហេតុបានបង្ហាញពីផ្ទះដែលរងការខូចខាត និងសម្ភារៈយោធាត្រូវបានដុតបំផ្លាញ ដោយទាហានបន្តល្បាតក្នុងតំបន់នោះ។

ទាហានរុស្ស៊ីម្នាក់បាននិយាយថា "មិនមានកម្លាំងសត្រូវច្រើនទេ។ យើងព្យាយាមកាត់បន្ថយការខាតបង់របស់យើង ដើម្បីឱ្យ [ចំនួនរបស់ពួកគេ] តិចជាងមុន ហើយពួកគេត្រូវបានដកចេញដោយស្ងៀមស្ងាត់ មិនមានកងកម្លាំងធ្ងន់ធ្ងរទេ។ ប្រជាជនស៊ីវិល ខ្ញុំសូមស្បថថា នៅពេលដែលយើងចូល (ភូមិ) Bugas ទាហានម្នាក់មកពីទីក្រុង Donetsk បាននិយាយថា មនុស្សបានចេញមកក្រៅ ហើយមើលមកពួកយើងដោយយំ។ ខ្ញុំស្រក់ទឹកភ្នែករួចហើយ។

ប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីថ្ងៃទី ២៤ ខែកុម្ភៈ បានអនុញ្ញាតឱ្យ "ប្រតិបត្តិការយោធាពិសេស" នៅក្នុងតំបន់ Donbass បីថ្ងៃបន្ទាប់ពីគាត់បានចុះហត្ថលេខាលើក្រឹត្យចំនួនពីរដែលទទួលស្គាល់ "សាធារណរដ្ឋ" ទាំងពីរជា "រដ្ឋឯករាជ្យ និងអធិបតេយ្យភាព"។

អ្នកនាំពាក្យវិមានក្រឹមឡាំង លោក Dmitry Peskov បាននិយាយនៅថ្ងៃដដែលនោះថា កងកម្លាំងប្រដាប់អាវុធក្នុងស្រុកនៅ Donetsk និង Luhansk បានបំបែកខ្សែការពាររបស់កងកម្លាំងប្រដាប់អាវុធអ៊ុយក្រែន ដោយមានការគាំទ្រពីកងកម្លាំងប្រដាប់អាវុធរុស្ស៊ី៕