ហុងកុងរកឃើញករណីឆ្លងកូវីដ១៩ថ្មីជាង ៦០០០ ករណី

ហុងកុង៖ ហុងកុងបានរាយការណ៍ថា មានករណីឆ្លងកូវីដ១៩ថ្មី ចំនួន ៦,០៦៧ នាក់ ក្នុងរយៈពេល ២៤ ម៉ោងកន្លងមកនេះ។ នេះបើយោងតាមទិន្នន័យពីមជ្ឈមណ្ឌលការពារសុខភាពកាលពីថ្ងៃអាទិត្យ។

មជ្ឈមណ្ឌលការពារសុខភាពបាននិយាយថា ករណីដែលបានរាយការណ៍ថ្មីរួមមានករណីនាំចូលចំនួន ១២ និងករណីក្នុងស្រុកចំនួន ៦,០៥៥នាក់ ។

លោក Edwin Tsui អ្នកគ្រប់គ្រងមជ្ឈមណ្ឌលការពារសុខភាពនៃនាយកដ្ឋានសុខាភិបាលក្រោមរដ្ឋាភិបាលតំបន់រដ្ឋបាលពិសេសហុងកុង (HKSAR) បាននិយាយកាលពីថ្ងៃអាទិត្យថា ដោយមានការគាំទ្រពីរដ្ឋាភិបាលកណ្តាល រដ្ឋាភិបាល HKSAR បានបង្កើនជាបន្តបន្ទាប់នូវសមត្ថភាពធ្វើតេស្តក្នុងស្រុក មន្ទីរពិសោធន៍ធ្វើតេស្តរកកូវីដ១៩ ហ័រយៀន (Huoyan) ត្រូវបានដាក់ឱ្យដំណើរការ។

លោកបន្តថា «ដោយសារចំនួនករណីដែលបានរាយការណ៍ជារៀងរាល់ថ្ងៃនៅតែបន្តកើនឡើង វិធានការរក្សាគម្លាតសង្គមគឺចាំបាច់ត្រូវតែបន្ត។ ប្រជាពលរដ្ឋគួរតែជៀសវាងការចេញទៅក្រៅតាមដែលអាចធ្វើទៅបាន ហើយមិនគួរមានការជួបជុំដែលមិនចាំបាច់ រួមទាំងការជួបជុំគ្នារវាងគ្រួសារផងដែរ។ ហើយចំពោះអ្នកដែលមិនបានចាក់វ៉ាក់សាំង នឹងទទួលការចាក់វ៉ាក់សាំងឱ្យបានឆាប់តាមដែលអាចធ្វើទៅបាន »។

កាលពីថ្ងៃសៅរ៍ ការសាងសង់កន្លែងព្យាបាលនៅដាច់ដោយឡែកចំនួនពីរ ដែលត្រូវបានសាងសង់ឡើង ដោយមានជំនួយពីចិនបានចាប់ផ្តើមនៅ Penny's Bay និង Kai Tak Pier ក្នុងទីក្រុងហុងកុង។អគារនេះ រចនា និងសាងសង់ដោយក្រុមហ៊ុន China State Construction International Holdings Ltd. ុ។ កន្លែងទាំងពីរត្រូវបានគេរំពឹងថា នឹងផ្តល់កន្លែងដាក់ឱ្យនៅដាច់ពីគេប្រហែល ៩,៥០០ នៅពេលដំណើរការពេញលេញ៕