ភ្នំពេញ៖ ឆ្នាំ២០២២នេះ កម្ពុជាក្លាយជាប្រធានអាស៊ាន។៣ថ្ងៃបន្ទាប់ពីកម្ពុជាបំពេញតួនាទីជាប្រធានអាស៊ានជាលើកទីបី លោកប្រាក់ សុខុន រដ្ឋមន្ត្រីក្រសួងការបរទេស ជាបេសកជនរបស់ប្រធានអាស៊ាន ត្រូវបានវិទ្យាស្ថាន ISEAS-Yusof Ishak អញ្ជើញថ្លែងអំពីមូលបទ និងអាទិភាពសំខាន់ៗនៃភាពជាប្រធានអាស៊ានរបស់កម្ពុជានៅឆ្នាំ ២០២២។ក្នុងសន្ទរកថានោះ ប្រមុខកាទូតរបស់កម្ពុជាបង្ហាញពីក្តីកង្វល់ពីការប្រជែង«ឥទ្ធិពល»រវាងចិន-អាម៉េរិកនៅតំបន់អាស៊ាន។
"សម្ពាធយ៉ាងធំធេងរបស់អាស៊ាន គឺកើតចេញពីការប្រកួតប្រជែងភូមិសាស្ត្រនយោបាយរវាងប្រទេសមហាអំណាច ក៏ដូចជាមហាអំណាចថ្នាក់កណ្តាល។"នេះជាការលើកឡើងរបស់លោក ប្រាក់ សុខុន ជាបេសកជនរបស់ប្រធានអាស៊ាន។លោកគ្មានប្រទេសសមាជិកអាស៊ានណាមួយចង់ចាប់យកភាគីណាមួយនោះឡើយ ហើយអាស៊ានសង្ឃឹមថា មហាអំណាចធំបំផុតទាំងពីរអាចកសាងទំនាក់ទំនងដែលមានស្ថិរភាព អាចព្យាករណ៍បាន និង មានភាពល្អប្រសើរ។
បើតាមប្រមុខកាទូតកម្ពុជារូបនេះ កម្ពុជាមានការបារម្ភកាន់តែខ្លាំង ចំពោះនិន្នាការនៃការបែងចែកសណ្តាប់ធ្នាប់ពិភពលោកជាពីរ នៅគ្រប់ទិដ្ឋភាព ចាប់ពីនយោបាយ រហូតដល់សេដ្ឋកិច្ច ពាណិជ្ជកម្ម បច្ចេកវិទ្យា និងលំហ អ៊ីនធើនែត ហើយវាបានក្លាយជាបញ្ហាប្រឈមផ្ទៃក្នុង និង ជាលក្ខណៈស្ថាប័នរបស់អាស៊ាន។ សម្ពាធលើមជ្ឈភាពអាស៊ាន ការឯកភាព និង ភាពធន់របស់អាស៊ាន ចំពេលដែលមានការប្រកួតប្រជែងអំណាចដែលកំពុងកើនឡើង។
លោកថា ឆ្នាំខាងមុខនឹងកាន់តែលំបាកសម្រាប់អាស៊ានក្នុងការរក្សាឯកភាព ភាពស្អិតរមួត និងគ្រួសារអាស៊ាន១០ ដើម្បីដោះស្រាយបញ្ហាស្ថាប័នដែលកំពុងលេចឡើង និង ដើម្បីបន្តដំណើរការកសាងសហគមន៍ និង ជំរុញសមាហរណកម្ម។ល។
គួរបញ្ជាក់ថា កម្ពុជាក្នុងនាមជាប្រធានអាស៊ានប្តូរវេន បានប្តេជ្ញាដោះស្រាយវិបត្តិជាប់គាំងនយោបាយនៅភូមាដែលជាបញ្ហាក្តៅមួយនៅក្នុងតំបន់។ភូមាបានធ្វើពហិការមិនចូលរួមកិច្ចប្រជុំកំពូលអាស៊ាន ក្រោយប្រទេសប្រ៊ុយណេដែលជាប្រធានអាស៊ានក្នុងឆ្នាំនេះ មិនបានអញ្ជើញមេដឹកនាំភូមាលោក មីន អោងឡាំងឱ្យចូលរួមកិច្ចប្រជុំនោះទេ។
តែយ៉ាងណា ក្នុងការដោះស្រាយជម្លោះភូមិសាស្ត្រនយោបាយ និងយុទ្ធសាស្ត្រដែលកំពុងកើនឡើង កម្ពុជាប្តេជ្ញានឹងខិតខំពង្រឹងមជ្ឈភាពអាស៊ាន ដើម្បីរក្សាសន្តិភាព សន្តិសុខ និងវិបុលភាព ដោយនឹងផ្តោតលើការពង្រឹងពហុភាគីនិយម និងដំណើរការ ពហុភាគី តាមរយៈយន្តការដឹកនាំដោយអាស៊ាន និងការពង្រឹងសកម្មភាពរួមគ្នាដែលមានលក្ខណៈ បើកចំហ តម្លាភាព បរិយាប័ន្ន និងផ្អែកលើវិធានច្បាប់៕
