ភ្នំពេញ៖ ប្រធានរដ្ឋនៃសាធារណរដ្ឋសង្គមនិយមវៀតណាមលោក ង្វៀន សួនហ៊្វុក នៅថ្ងៃទី ២១ ធ្នូនេះ បានចាប់ផ្តើមបំពេញទស្សនកិច្ចផ្លូវការរយៈពេល២ថ្ងៃនៅកម្ពុជា ចាប់ពីថ្ងៃទី២១ ដល់២២ ខែធ្នូ ឆ្នាំ២០២១។ដំណើរទស្សនកិច្ចរបស់ប្រធានាធិបតីវៀតណាមរូបនេះ ធ្វើឡើងតិចជាង២សប្តាហ៌មុនពេលដែលប្រទេសកម្ពុជា ធ្វើជាប្រធានប្តូរវេនសមាគមអាស៊ាននៅដើមឆ្នាំ២០២២។
ក្នុងពេលបំពេញទស្សនកិច្ចនៅកម្ពុជា លោក ង្វៀន សួនហ៊្វុក នឹងចូលក្រាបថ្វាយបង្គំគាល់ព្រះករុណាព្រះមហាក្សត្រ បរមនាថ នរោត្តម សីហមុនី និងសម្តេចព្រះមហាក្សត្រីនរោត្តម មុនិនាថ សីហនុ ហើយក៏គ្រោងជួបសម្តេច សាយ ឈុំ ប្រធានព្រឹទ្ធសភា សម្តេច ហេង សំរិន ប្រធានរដ្ឋសភា និងសម្តេចនាយករដ្ឋមន្ត្រី ហ៊ុន សែន។
យោងតាមក្រសួងការបរទេសកម្ពុជា បានអះអាងថា ដំណើរទស្សនកិច្ចផ្លូវរដ្ឋរបស់លោក ង្វៀន សួនហ៊្វុក មកកាន់ព្រះរាជាណាចក្រកម្ពុជា នឹងបន្តពង្រឹង និងធ្វើឱ្យកាន់តែឲ្យស៊ីជម្រៅបន្ថែមទៀតនូវទំនាក់ទំនងទ្វេភាគី ក្នុងស្មារតីជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងសន្តិភាព-ស្ថិរភាពយូរអង្វែងរវាងប្រទេសទាំងពីរ ដើម្បីជាប្រយោជន៍ទៅវិញទៅមកសម្រាប់ប្រជាជននៃប្រទេសទាំងពីរ។
ជាការកត់សម្គាល់ កាលពីខែកញ្ញា ឆ្នាំ២០២១ ប្រធានរដ្ឋវៀតណាមរូបនេះ ក៏បានបំពេញទស្សនកិច្ចនៅប្រទេសឡាវដែលជាប់ភូមិផងរបងជាមួយកម្ពុជាផងដែរ។ទស្សនកិច្ចនេះ អាចជាអ្វីមួយដែលមើលឃើញថា វៀតណាមកំពុងព្យាយាមរក្សាឥទ្ធិពលរបស់ខ្លួននៅក្នុងប្រទេសក្បែរខាង ក្នុងពេលដែលប្រទេសចិនកំពុងតែពង្រីកឥទ្ធិពលរបស់ខ្លួនក្នុងតំបន់។
ប្រទេសវៀតណាម មានព្រំដែនជាប់ជាមួយប្រទេសចិន និង ជាភាគីជម្លោះទាមទារអធិបតេយ្យក្នុងដែនសមុទ្រចិនខាងត្បូង។មិនតិចជាង១សប្តាហ៌មុនពេលដែលប្រទេសកម្ពុជា ធ្វើជាប្រធានប្តូរវេនសមាគមអាស៊ាននៅដើមឆ្នាំ២០២២។ក្នុងនាមជាប្រធានប្តូរវេនអាស៊ាន សម្តេច ហ៊ុន សែន បានប្រកាសនឹងខិតខំសម្របសម្រួលក្នុងចំណោមប្រទេសសមាជិកអាស៊ានជាមួយប្រទេសចិនក្នុងបញ្ហាជម្លោះនៅសមុទ្រចិនខាងត្បូង ដើម្បីសម្រេចឲ្យបានក្រមប្រតិបត្តិមួយសម្រាប់សមុទ្រចិនខាងត្បូង ឬហៅកាត់ថា COC (Code of Conduct for the South China Sea)។ម្យ៉ាងវិញទៀត ដំណើរទស្សនកិច្ចរបស់ប្រធានាធិបតីវៀតណាមនៅកម្ពុជាលើកនេះ អាចនឹងជជែកពីបញ្ហាមួយចំនួនដូចជាបញ្ហាភូមាផងដែរ។
គួរបញ្ជាក់ថា ក្នុងអំឡុងពេលលោកបំពេញទស្សនកិច្ចផ្លូវការរយៈពេល២ថ្ងៃនៅកម្ពុជា ប្រធានាធិបតីវៀតណាម លោក ង្វៀន សួនហ៊្វុក នឹងធ្វើដំណើរទៅធ្វើជាអធិបតីបញ្ចុះបឋមសិលាសាងសង់អគាររដ្ឋបាលថ្មីមួយរបស់រដ្ឋសភាកម្ពុជា។ការសាងសង់អគាររដ្ឋបាលថ្មីរបស់រដ្ឋសភាកម្ពុជា គ្រោងនឹងបើកការដ្ឋាននៅដើមឆ្នាំ២០២២ ចំណាយទឹកប្រាក់អស់ ២៥ លានដុល្លារអាមេរិកដែលជាជំនួយរបស់រដ្ឋាភិបាលវៀតណាម៕