WHOបានអនុម័តវ៉ាក់សាំងរបស់ឥណ្ឌាដើម្បីប្រើប្រាស់ជាបន្ទាន់

WHO៖ អង្គការសុខភាពពិភពលោក (WHO) បានផ្តល់ការយល់ព្រម លើការប្រើប្រាស់ជាបន្ទាន់សម្រាប់វ៉ាក់សាំង Covid-19 ដែលផលិតដោយវិទ្យាស្ថាន Serum នៃប្រទេសឥណ្ឌា ក្រោមអាជ្ញាប័ណ្ណពីក្រុមហ៊ុនជីវបច្ចេកវិទ្យាអាមេរិក Novavax ។ នេះគឺជា វ៉ាក់សាំងទី៩ ដែលត្រូវបានអនុម័ត។

នៅក្នុងសេចក្តីប្រកាសព័ត៌មានមួយកាលពីថ្ងៃសុក្រ WHO បាននិយាយថា ការផ្តល់ការចុះបញ្ជីប្រើប្រាស់ក្នុងគ្រាអាសន្ន (EUL) ដល់វ៉ាក់សាំងដែលមានឈ្មោះថា Covovax គឺជាជំហានដ៏ល្អមួយឆ្ពោះទៅមុខក្នុងកិច្ចខិតខំប្រឹងប្រែងបន្តក្នុងការចាក់វ៉ាក់សាំង ដល់ប្រជាជនកាន់តែច្រើននៅក្នុងប្រទេសដែលមានចំណូលទាប។

វ៉ាក់សាំងនេះ ត្រូវបានផលិតដោយវិទ្យាស្ថាន Serum នៃប្រទេសឥណ្ឌាក្រោមអាជ្ញាប័ណ្ណពី Novavax ហើយគំនិតផ្តួចផ្តើមចែករំលែកវ៉ាក់សាំង Covax បានបញ្ជាទិញវ៉ាក់សាំងចំនួន ៣៥០ លានរួចហើយ។

វេជ្ជបណ្ឌិត Mariangela Simao អគ្គនាយកជំនួយរបស់អង្គការសុខភាពពិភព បាននិយាយថា ការចុះបញ្ជីនេះ មានគោលបំណងបង្កើនលទ្ធភាពទទួលបានជាពិសេសនៅក្នុងប្រទេស ដែលមានប្រាក់ចំណូលទាបចំនួន ៤១ នៅតែមិនអាចចាក់វ៉ាក់សាំង ១០% នៃចំនួនប្រជាជនរបស់ពួកគេ ខណៈពេលដែល ៩៨ ប្រទេសមិនទាន់ឈានដល់ ៤០%។

ការបាញ់ថ្នាំ Novavax ដែលជាវ៉ាក់សាំង ប្រូតេអ៊ីនដែលប្រើប្រាស់បច្ចេកវិទ្យាដែលត្រូវបានប្រើប្រាស់អស់ជាច្រើនទសវត្សរ៍ ដើម្បីការពារមនុស្សពីជំងឺរលាកថ្លើម ជំងឺរើម និងការឆ្លងមេរោគផ្សេងទៀតបានបង្ហាញពីប្រសិទ្ធភាពខ្ពស់ដោយមានអត្រាការពារបាន ៨៩.៧% ប្រឆាំងនឹង Covid-19 ក្នុងការសាកល្បង៕