ក្រុម Hacker បារាំងបានបង្កើត«លិខិតឆ្លងដែនវ៉ាក់សាំង»ក្លែងក្លាយជាង ៥ ម៉ឺន

បារាំង៖ ក្រុម Hacker ត្រូវបានគេរាយការណ៍ថា បានទទួលព័ត៌មានលម្អិតផ្ទាល់ខ្លួនរបស់គិលានុបដ្ឋាយិកានៅទីក្រុង Nantes របស់ប្រទេសបារាំង ហើយបានប្រើប្រាស់ទិន្នន័យនេះ ដើម្បីបង្កើតលិខិតឆ្លងដែនវ៉ាក់សាំងចំនួន ៥៤,០០០។ ហើយរដ្ឋាភិបាលបារាំង បានរកឃើញបណ្ណក្លែងក្លាយបែបនេះចំនួន ១១០,០០០ រហូតមកដល់បច្ចុប្បន្ន។

ប្រព័ន្ធលិខិតឆ្លងដែនរបស់ប្រទេសបារាំងបានដំណើរការស្រដៀងគ្នាទៅនឹងបណ្ណវ៉ាក់សាំងដែលកំពុងប្រើប្រាស់នៅទូទាំងសហភាពអឺរ៉ុប។ ប្រព័ន្ធនេះដំណើរការដោយការផ្គូផ្គងសោសាធារណៈ ដែលមាននៅក្នុង QR កូដ លើទូរស័ព្ទរបស់អ្នកបានចាក់វ៉ាក់សាំង។

ជាមួយនឹងសោឯកជននេះ ត្រូវបានគ្រប់គ្រងដោយមន្ទីរពេទ្យ ឱសថស្ថាន ឬអ្នកផ្តល់សេវាថែទាំសុខភាពដែលបានចាក់វ៉ាក់សាំងពួកគេ។ កន្លែងពិនិត្យមើលសុពលភាពនៃកូវីដ១៩ នឹងធ្វើការស្កេនកូដ ហើយទទួលបានសញ្ញាធីកពណ៌បៃតង ប្រសិនបើវាត្រូវនឹងសោឯកជន ហើយវានឹងលោកក្រហម ប្រសិនបើវាមិនត្រឹមត្រួវ។

កូនសោឯកជនមួយ ដូចជាកូនសោដែលកាន់ដោយគិលានុបដ្ឋាយិកានៅ Nantes អាចត្រូវបានប្រើដើម្បីបង្កើតចំនួនវ៉ាក់សាំងដែលដំណើរការដោយគ្មានដែនកំណត់ ដែលធ្វើឱ្យព័ត៌មាននេះមានតម្លៃខ្ពស់ចំពោះក្រុម Hacker និងអ្នកបោកប្រាស់ មួយចំនួនក្រោយមកលក់បណ្ណក្លែងក្លាយតាមអ៊ីនធឺណិត។

រដ្ឋមន្ត្រីក្រសួងមហាផ្ទៃបារាំងលោក Gerald Darmanin បាននិយាយកាលពីថ្ងៃព្រហស្បតិ៍ថា រដ្ឋាភិបាលបានរកឃើញបណ្ណវ៉ាក់សាំងក្លែងក្លាយចំនួន ១១០,០០០ កំពុងចរាចរ ហើយបានចាប់ខ្លួនមនុស្សជាង ១០០ នាក់ ពាក់ព័ន្ធនឹងការក្លែងបន្លំ។ ចំពោះករណីនេះ ជនបង្កអាចជាប់ពន្ធនាគាររយៈពេលប្រាំឆ្នាំ ប៉ុន្តែអាជ្ញាធរថា ពួកគេនឹងផ្តល់ការលើកលែងទោសដល់នរណាម្នាក់ដែល "ទទួលស្គាល់កំហុសរបស់ពួកគេ និងទទួលការចាក់វ៉ាក់សាំង"។

ការដកហូតលិខិតឆ្លងដែនវ៉ាក់សាំងក្លែងក្លាយ បានបន្ថែមបញ្ហាដល់អាជ្ញាធរ ដើម្បីលុបចោលបណ្ណវ៉ាក់សាំងក្លែងក្លាយ រាល់លិខិតឆ្លងដែនដែលបង្កើតចេញពីសោឯកជនដូចគ្នាត្រូវតែលុបចោល មានន័យថាត្រូវបង្កើតលិខិតឆ្លងដែនថ្មីសម្រាប់អ្នកដែលមានសិទ្ធិពិតប្រាកដ។

នៅតំបន់ជាយក្រុងប៉ារីសកាលពីខែមុន វេជ្ជបណ្ឌិតម្នាក់ត្រូវបានចាប់ខ្លួន បន្ទាប់ពីត្រូវបានចោទប្រកាន់ថាបានលក់បណ្ណក្លែងក្លាយយ៉ាងហោចណាស់ចំនួន ២២០ សន្លឹកសម្រាប់ទឹកប្រាក់ចំនួន ១,០០០ អឺរ៉ូ (១,១៣២ ដុល្លារអាមេរិក) ក្នុងម្នាក់។

ត្រូវបានណែនាំក្នុងរដូវក្តៅ ប្រព័ន្ធ 'ប័ណ្ណសុខភាព' របស់ប្រទេសបារាំងតម្រូវឱ្យពលរដ្ឋបង្ហាញភស្តុតាងនៃការចាក់វ៉ាក់សាំងការពារ ឬការធ្វើតេស្តរកមេរោគឆ្លងអវិជ្ជមាន ដើម្បីចូលទៅកាន់បារ ភោជនីយដ្ឋាន ផ្សារទំនើប ឬការដឹកជញ្ជូនសាធារណៈ ក្នុងចំណោមទីតាំងផ្សេងទៀត៕