រដ្ឋអាជ្ញាកំពូលរបស់ចិនសម្រេចចាប់ខ្លួនអតីតអនុរដ្ឋមន្ត្រីដោយសារបំពានវិន័យនិងច្បាប់ធ្ងន់ធ្ងរ

ចិន៖ ព្រះរាជអាជ្ញាកំពូលនៃប្រទេសចិនបានប្រកាសនៅថ្ងៃទី ៥ បានសម្រេចចិត្តចាប់ខ្លួន លោក ស៊ុន លី ជីន（Sun Li Jun）អតីតអនុរដ្ឋមន្ត្រីក្រសួងសន្តិសុខសាធារណៈ ដោយសង្ស័យថាពាក់ព័ន្ធនឹងអំពើពុករលួយ និងបានបំពានវិន័យនិងច្បាប់យ៉ាងធ្ងន់ធ្ងរ ។ ហើយករណីរបស់ លោក ស៊ុន លី ជីន កំពុងត្រូវបានដំណើរការតាមនិតិវិធីបន្ថែម។

គេហទំព័រផ្លូវការរបស់គណៈកម្មាធិការកណ្តាលសម្រាប់អធិការកិច្ចវិន័យនៃបក្សកុម្មុយនិស្តចិនបានប្រកាសកាលពីខែ មេសា ឆ្នាំមុនថា អនុរដ្ឋមន្ត្រីក្រសួងសន្តិសុខសាធារណៈ លោក ស៊ុន លី ជីន ត្រូវបានគេសង្ស័យថា បានបំពានវិន័យនិងច្បាប់យ៉ាងធ្ងន់ធ្ងរ ហើយគាត់ត្រូវបានគណៈកម្មការកណ្តាលសម្រាប់អធិការកិច្ចវិន័យនិងគណៈកម្មការត្រួតពិនិត្យរដ្ឋ ធ្វើការតាមដាននិងស៊ើបអង្កេត។

គណៈកម្មការកណ្តាលសម្រាប់អធិការកិច្ចវិន័យមិនបានជូនដំណឹងដល់ លោក ស៊ុន លី ជីន អំពីហេតុផលជាក់លាក់សម្រាប់ការស៊ើបអង្កេតនោះទេ។ ប៉ុន្តែគណៈកម្មាធិការបក្សនៃក្រសួងសន្តិសុខសាធារណៈ បានចង្អុលបង្ហាញនៅពេលនោះថា ការស៊ើបអង្កេតទៅលើលោក ស៊ុន លី ជីន គឺដោយសារ "គាត់បានព្រងើយកន្តើយនឹងវិន័យនយោបាយ និងច្បាប់របស់គណបក្សអស់រយៈពេលជាយូរមកហើយ ហើយនេះជាលទ្ធផលនៅការគ្មានវិន័យ មិនគោរពច្បាប់ទម្លាប់ មិនកោតខ្លាច និងធ្វើអ្វីតាមតែចិត្តចង់របស់គាត់ដែលមិនអាចជៀសផុតបាន"។

ក្រោយមក គណៈកម្មការត្រួតពិនិត្យរដ្ឋនៃគណៈកម្មការកណ្តាលសម្រាប់អធិការកិច្ចវិន័យ បានជូន ដំណឹងក្នុងខែកញ្ញាឆ្នាំនេះថា លោក ស៊ុន លី ជីន បានប្រព្រឹត្តល្មើសច្បាប់ និងវិន័យយ៉ាងធ្ងន់ធ្ងរ ហើយត្រូវបានបណ្តេញចេញពីបក្ស និងដកតំណែងជាមន្ត្រី។ លោក ស៊ុន លី ជីន ត្រូវបានចោទប្រកាន់ថា "មានមហិច្ឆតានយោបាយយ៉ាងខ្លាំង" ដោយ "បង្កើតបក្សពួកនិងអំណាចគ្រប់គ្រងក្រសួងសំខាន់ៗ" ទាំងនេះបានបង្ហាញថា គាត់ទំនងជាត្រូវកាត់ទោសយ៉ាងធ្ងន់ធ្ងរ៕