ភ្នំពេញ៖ ប្រទេសកម្ពុជា និងវៀតណាម នៅថ្ងៃទី ២១ តុលានេះ បានបើកកិច្ចប្រជុំពិគ្រោះយោបល់នយោបាយរវាងកម្ពុជា និងវៀតណាម លើកទី៧តាមប្រព័ន្ធវីដេអូ។ក្នុងកិច្ចប្រជុំ កម្ពុជា និងវៀតណាមឯកភាពពន្លឿនការបោះបង្គោលព្រំដែនគោកដែលនៅសល់១៦ភាគរយ។
នៅថ្ងៃទី២១ ខែតុលា ឆ្នាំ២០២១ លោកជំទាវសឿង រដ្ឋចាវី រដ្ឋលេខាធិការ ក្រសួង ការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និងឯកឧត្តម ង្វៀន គួកហ្ស៊ុងអនុរដ្ឋមន្ត្រីការបរទេស នៃសាធារណរដ្ឋសង្គមនិយមវៀតណាម បានធ្វើជាសហប្រធាននៃកិច្ចប្រជុំពិគ្រោះយោបល់នយោបាយរវាងកម្ពុជា-វៀតណាម លើកទី៧ តាមប្រព័ន្ធវីដេអូ។
ក្នុងកិច្ចប្រជុំនោះភាគីទាំងពីរបានស្វាគមន៍ពិធីផ្លាស់ប្តូរលិខិតូបករណ៍ នៃការផ្តល់សច្ចាប័នលើឯកសារច្បាប់សំខាន់ចំនួនពីរ ដើម្បីកត់ត្រាការសម្រេចបាន ៨៤% នៃការខណ្ឌសីមា និងបោះបង្គោលព្រំដែនគោករវាងប្រទេសទាំងពីរជាផ្លូវការ។ ភាគីទាំងពីរបានឯកភាព ធ្វើការពន្លឿនកិច្ចពិភាក្សាក្នុងការស្វែងរកដំណោះស្រាយដែលអាចទទួលយកបានទាំងសងខាង ចំពោះព្រំដែនគោកចំនួន១៦% ដែលនៅសល់មិនទាន់បានខណ្ឌសីមា។
សូមបញ្ជាក់ថា កម្ពុជា និងវៀតណាម មានព្រំដែនគោករួមគ្នាប្រវែង ១២៧០គីឡូម៉ែត្រ ដោយភាគីទាំងពីរបានព្រមព្រៀងគ្នាសម្រេចកិច្ចការបោះបង្គោលព្រំដែនបានចំនួន៨៤%ហើយ។កាលពីថ្ងៃទី៥ ខែតុលា ឆ្នាំ២០១៩ ភាគីទាំងពីរ បានចុះហត្ថលេខាលើសេចក្តីព្រាងច្បាប់ស្តីពីការអនុម័តយល់ព្រមលើពិធីសារខណ្ឌសីមា និងបោះបង្គោលព្រំដែនគោករវាងប្រទេសកម្ពុជា និងវៀតណាម ដែលមាន៣មាត្រា៕
