Yearendyearend1140x150
Img 0571

មនុស្ស៤នាក់លង់ទឹកស្លាប់នៅឆ្នេរជំទាវម៉ៅ ខេត្តព្រះសីហនុ

សង្គម
/
អ្នកយកព័ត៌មាន:
ស៊ីស៊ីថាមស៍
/

ព្រះសីហនុ៖ មនុស្សចំនួន៤នាក់ បានស្លាប់បាត់បង់ជីវិត ក្នុងករណីលង់ទឹក នៅឆ្នេរជំទាវម៉ៅ ស្ថិតនៅភូមិគគី ឃុំបិតត្រាំង ស្រុកព្រៃនប់ ខេត្តព្រះសីហនុ ខណៈម្នាក់កំពុងជួយសង្គ្រោះនៅមន្ទីរពេទ្យ។អាជ្ញាធរខេត្តព្រះសីហនុ បានចាត់ទុកករណីនេះ ជាឧបទ្ទវហេតុដែលមិនគួរកើតមាននោះទេ។

យោងតាមរបាយការណ៍ចុះក្រោយរបស់រដ្ឋបាលខេត្តព្រះសីហនុ ប្រតិបត្តិការនៃការជួយសង្រ្គោះជនរងគ្រោះដោយករណីលង់ទឹក នៅចំណុចឆ្នេរជំទាវម៉ៅ បានបិទបញ្ចប់បន្ទាប់ពីជនរងគ្រោះចុងក្រោយត្រូវបានក្រុមជួយសង្រ្គោះបានរកឃើញនៅវេលាម៉ោង០១ និង០០​នាទី រំលងអាធ្រាត ចូលថ្ងៃ​ទី៨ ខែតុលា ឆ្នាំ២០​២១។

ជនរងគ្រោះមានគ្នាចំនួន០៥នាក់ មានទីលំនៅក្នុងខេត្តព្រះសីហនុ បានស្លាប់ចំនួន៤នាក់ និងសង្គ្រោះបានម្នាក់មានឈ្មោះ ឡេង សុខជា ភេទប្រុស អាយុ១០ឆ្នាំ។

មុនកើតហេតុ ជនរងគ្រោះទាំង០៥នាក់ បានចុះលេងទឹកសមុទ្រនៅ កន្លែងកើតហេតុខាងលើ ក្នុងខណៈពេលនោះ ឈ្មោះ ឡេង ដាវ បានលង់ទឹក បន្ទាប់មកបងប្អូនទាំង០៤នាក់ដែលកំពុងលេងទឹកជាមួយបាននាំគ្នាទៅជួយ ទើបបណ្តាលឱ្យទឹករលកបោកទាញយកទៅតាមទឹកបាត់អស់។ក្នុងនោះឈ្មោះ ឡេង សុខជា ពាក់ពោងរូបក្ងាន ត្រូវបានជួយសង្រ្គោះទាន់ពេល។ ចំណែកឯឈ្មោះ ឡេង ឌៀប ក៏ត្រូវបានជួយបានភ្លាមៗដែរ តែបានស្លាប់ក្រោយពី ស្រង់យកមកលើគោក។ 

សូមបញ្ជាក់ថា កាលពីថ្ងៃទី៥ ខែតុលា ឆ្នាំ២០២១ កន្លងមក ក៏មានករណីក្មេងស្រីអាយុ១១ឆ្នាំម្នាក់ ដែលចុះលេងទឹកសមុទ្រហើយបានលង់ទឹក ក្នុងនោះបានត្រូវបានក្រុមឆ្មាំសមុទ្រជួយសង្រ្គោះទាន់ពេលវេលា។ ដោយឡែកករណីខាងលើ រដ្ឋបាលខេត្តព្រះសីហនុ ចាត់ទុកថា គឺជាឧបទ្ទវហេតុដែលមិនគួរកើតមាន និង ចូលរួមរំលែកមរណៈទុក្ខដ៏ក្រៀមក្រំជាមួយក្រុមគ្រួសារសព។

រដ្ឋបាលខេត្ត សូមអំពាវនាវដល់ភ្ញៀវទេសចរជាតិ និងអន្តរជាតិ ដែលមកលេងកំសាន្តនៅតាមរមណីយដ្ឋាននានានៅខេត្តព្រះសីហនុ ជាពិសេសនៅតាមតំបន់ឆ្នេរសមុទ្រ ត្រូវអនុវត្តតាមការណែនាំ និងវិធានការសុវត្ថិភាព របស់មន្ត្រីទេសចរណ៍ និងមន្ត្រីនគរបាលទេសចរណ៍ ដោយត្រូវបង្កើនការប្រុងប្រយ័ត្ន ជាពិសេសមិនត្រូវបណ្តោយកូនតូចៗចុះលេងទឹកជ្រៅ ឬក្នុងស្ថានភាពដែលមានរលកធំៗបោកបក់នោះទេ ដើម្បីបញ្ចៀសបាននូវគ្រោះថ្នាក់ដែលអាចកើតឡើងជាយថាហេតុ៕


ផ្ទាំងពាណិជ្ជកម្ម
Img 4048
ពាក្យទាក់ទង: ព្រះសីហនុ
Photo 2023 06 28 13.36.05
Photo 2022 10 27 10.25.23
Khcct banner

អត្ថបទទាក់ទង