Cct850x100 1
1800px x h300px kh

ប្រទេសចិនបានចាប់ផ្តើមបេសកកម្មនាវិកដំបូងសម្រាប់សាងសង់ស្ថានីយ៍អវកាស

អន្តរជាតិ
/
អ្នកយកព័ត៌មាន:
លី ម៉ាលីង
/

ចិន៖ កាលពីថ្ងៃព្រហស្បតិ៍ប្រទេសចិនបានបាញ់បង្ហោះយានអវកាស Shenzhou-12 ប្រកបដោយជោគជ័យ ដោយមានអវកាសយានិកចំនួន ៣ រូបទៅកាន់ម៉ូឌុលស្នូលនៃស្ថានីយ៍អវកាស Tianhe និងនឹងស្នាក់នៅរយៈពេល ៣ ខែ។

នេះជាបេសកកម្មលើកទី ៧ របស់ប្រទេសចិនដែលដឹកនាំដោយយានអវកាសនិងជាបេសកកម្មដំបូងបង្អស់ក្នុងដំណើរការសាងសង់ស្ថានីយ៍អវកាសរបស់ប្រទេសចិន។ វាក៏ជាលើកទី ១ ដែរក្នុងរយៈពេលជិត ៥ ឆ្នាំ បន្ទាប់ពីបេសកកម្មដែលដឹកនាំដោយមនុស្សចុងក្រោយរបស់ប្រទេសនេះ។

ទីភ្នាក់ងារអវកាសចិន (CMSA) បាននិយាយថា យានអវកាសដែលដឹកដោយរ៉ុក្កែត Long March-2F ត្រូវបានបាញ់ចេញពីមជ្ឈមណ្ឌលបាញ់បង្ហោះផ្កាយរណប Jiuquan នៅតំបន់វាលខ្សាច់ហ្គូប៊ីភាគពាយព្យប្រទេសចិននៅម៉ោង ០៩:២២ (ម៉ោងនៅប៉េកាំង)។

ប្រហែល ៥៧៣ វិនាទីបន្ទាប់ពីការបាញ់បង្ហោះ យានអវកាស Shenzhou-12 បានបំបែកចេញពីរ៉ុក្កែតហើយបានចូលទៅកាន់គន្លងដែលបានកំណត់។ CMSA បានប្រកាសថា យានអវកាសយាន Shenzhou-12 មានរាងល្អ ហើយការបាញ់បង្ហោះ គឺមានភាពជោគជ័យពេញលេញ។

អវកាសយានិកទាំង ៣ នាក់គឺមេបញ្ជាការ Nie Haisheng អាយុ ៥៦ ឆ្នាំជាទាហានជើងចាស់ ដែលបានចូលរួមក្នុងបេសកកម្ម Shenzhou-6 និង Shenzhou-10 ។ទី២ លោក Liu Boming អាយុ ៥៤ ឆ្នាំដែលជាផ្នែកមួយនៃបេសកកម្ម Shenzhou-7 និងទី៣ លោក Tang Hongbo អាយុ ៤៥ ឆ្នាំ ដែលនេះគឺជាបេសកកម្មអវកាសលើកដំបូងរបស់គាត់។

អវកាសយានិកទាំង ៣ នាក់នឹងស្ថិតនៅក្នុងម៉ូឌុលស្នូល Tianhe នៃស្ថានីយអវកាសរយៈពេល ៣ ខែដោយបន្តកំណត់ត្រាថ្មីរយៈពេល ៣៣ ថ្ងៃ ដែលបានកំណត់ដោយ Shenzhou-11ក្នុងឆ្នាំ ២០១៦ ។

ប្រទេសចិនបានបើកដំណើរការស្ថានីយ៍អវកាស Tianhe កាលពីថ្ងៃទី ២៩ ខែមេសា និងយាន Tianzhou-2 នៅថ្ងៃទី ២៩ ខែឧសភា។ យោងតាមបណ្ឌិត្យសភាបច្ចេកវិទ្យាអវកាសចិន (CAST) កញ្ចប់ធំ និងតូចជាង ១៦០ រួមទាំងការផ្គត់ផ្គង់សម្រាប់អវកាសយានិក និងឧបករណ៍ពិសោធន៍អវកាសត្រូវបានបញ្ជូនដោយ Tianzhou-2 នៅចុងខែឧសភា។

បើយោងតាម CMSA យានអវកាស Tianzhou-3 និងយានអវកាស Shenzhou-13 នឹងត្រូវបានចាប់ផ្តើមនៅចុងឆ្នាំនេះ ដើម្បីចូលចតនៅសា្ថនីយ៍ Tianhe ហើយអវកាសយានិក ៣ នាក់ផ្សេងទៀតនឹងចាប់ផ្តើមស្នាក់នៅរយៈពេល ៦ ខែនៅក្នុងគន្លងគោចរនេះ ។

បន្ទាប់ពីបេសកកម្មចាប់ផ្តើមចំនួន ៥ នៅឆ្នាំនេះប្រទេសចិនគ្រោងនឹងមានបេសកកម្មចំនួន ៦ បន្ថែមទៀតក្នុងនោះរួមមានការដាក់ឲ្យដំណើរការម៉ូឌុលមន្ទីរពិសោធន៍ Wentian និង Mengtian នៅឆ្នាំ ២០២២ ដើម្បីបញ្ចប់ការកសាងស្ថានីយ៍អវកាស៕

Khcct banner

អត្ថបទទាក់ទង