ភ្នំពេញ ៖ ស្ថានទូតសាធារណៈរដ្ឋប្រជាមានិតចិន ប្រចាំនៅព្រះរាជណាចក្រកម្ពុជា បានប្រគល់សំលៀកបំពាក់ និងស្រោមដៃពេទ្យជាច្រើន ដល់អគ្គស្នងការដ្ឋាននគរបាលជាតិ សំរាប់ប្រើប្រាស់ជាប្រយោជន៍ ដើម្បីបង្ការ និងទប់ស្កាត់ការរីករាលដាលវីរុស COVID-19។
ពិធីប្រគល់ទទួលធ្វើឡើងនៅរសៀលថ្ងៃទី២៤ ខែមិនា ឆ្នាំ២០២០នេះ នៅស្ថានទូតចិនប្រចាំព្រះរាជាណាចក្រកម្ពុជា ក្រោមអធិបតីភាព ឧត្តមសេនីយ៍ឯក ឡោ សុឡេង អគ្គស្នងការរងនគរបាលជាតិនិងជាស្នងការហិរញ្ញកិច្ច និងភស្តុភារ និងលោក ឆាង ភីង មន្ត្រីទំនាក់ទំនងការងារផ្នែកនគរបាលអមស្ថានទូតចិនប្រចាំកម្ពុជា។
ឧត្តមសេនីយ៍ឯក ឡោ សុឡេង អគ្គស្នងការរងនគរបាលជាតិ បានមានប្រសាសន៏ថា ស្ថិតក្នុងស្ថានភាពដែលពិភពលោកទាំងមូលបាន និងកំពុងធ្វើសង្គា្រមប្រឆាំងនិងវីរុស COVID-19នោះ ពិនិត្យឃើញថារដ្ឋាភិបាលចិន បានសម្តែងនូវកាយវិការឈានមុខជាគំរូរបស់ពិភពលោក ដោយបានផ្តល់នូវជំនួយមនុស្សធម៌ ឧបត្ថម្ភ គាំទ្រទាំងអ្នកបច្ចេកទេសវេជ្ជសាស្ត្រ ទាំងឧបករណ៍សម្ភារៈ បរិក្ខាបចេ្ចកទេស ជួយដល់បណ្តាប្រទេសដែលកំពុងតែរងគ្រោះដោយសារការវាយប្រហារនៃវីរុស COVID-19 ដែលក្នុងនោះក៏មានព្រះរាជណាចក្រកម្ពុជាផងដែរ។
