ភ្នំពេញ៖ ដំណើរទស្សនកិច្ចរបស់សម្តេចនាយករដ្ឋមន្រ្តី ហ៊ុន សែន ទៅកាន់ប្រទេសចិនក្នុងអំឡុងពេលដែលប្រទេសចិនកំពុងផ្ទុះជំងឺរលាកសួតបង្កដោយមេរោគ«កូរ៉ូណា»មានប្រជាពលរដ្ឋចិន និងកម្ពុជាជាច្រើនបានយកប្រធានបទនេះមកពិភាក្សាយ៉ាងក្តៅគគុក និងបានជូនពរឱ្យប្រទេសចិន និងកម្ពុជាមានចំណងមិត្តភាពយូរអង្វែង។
“ដំណើរទស្សនកិច្ចរបស់សម្តេចនាយករដ្ឋមន្រ្តី ហ៊ុន សែន ទៅកាន់ប្រទេសចិនក្នុងអំឡុងពេលមានជំងឺរាតត្បាតដ៏ធំមួយនេះ មិនត្រឹមតែមានការយកចិត្តទុកដាក់ខ្ពស់ពីប្រជាជនកម្ពុជាប៉ុណ្ណោះទេ ប៉ុន្តែខ្ញុំជឿជាក់ថា វាក៏នឹងទាក់ទាញចំណាប់អារម្មណ៍របស់ពិភពលោកផងដែរ។”នេះជាមតិលើកឡើងរបស់លោកផ្លុង វិចិត្រ អ្នកសារព័ត៌មានភាសាចិនល្បីឈ្មោះមួយរូបនៅកម្ពុជាដែលថ្លែងប្រាប់អ្នកយកព័ត៌មានទីភ្នាក់ងារសារព័ត៌មានចិន China News Sevice។
លោកវិចិត្របានមានប្រសាសន៍ថា ថ្មីៗនេះសម្តេច ហ៊ុន សែន បានបញ្ជាក់ជាច្រើនលើកថា ប្រទេសកម្ពុជាមានឆន្ទៈក្នុងការរួមសុខទុក្ខជាមួយប្រជាជនចិននៅក្នុងពេលវេលាដ៏សំខាន់មួយនេះ។អារម្មណ៍ពិតរបស់សម្តេចហ៊ុន សែន ចំពោះប្រទេសចិន ធ្វើឱ្យជនជាតិចិន និងអនិកជនចិននៅកម្ពុជាអាចទទួលយល់ពីអារម្មណ៍នេះ ហើយប្រជាជនចិនក៏អាចមានអារម្មណ៍បែបនេះដែរ។
China News Seviceបានផ្សាយថា បន្ទាប់ពីកាសែតក្នុងស្រុកជាភាសារចិន《The Cambodia China Times》បានចេញផ្សាយអត្ថបទ “សម្តេចនាយករដ្ឋមន្រ្តី ហ៊ុន សែន នឹងធ្វើទស្សនកិច្ចនៅទីក្រុងប៉េកាំង ព្រមទាំងជួបពិភាក្សាជាមួយថ្នាក់ដឹកនាំចិន”រួចមក គណនី Wechatឈ្មោះ Monorama បានបញ្ចេញមតិថា៖ “សូមយើងសហការ និងរួបរួមគ្នា ហើយសង្ឃឹមថា ប្រជាជននៅជុំវិញពិភពលោកមានសុវត្ថិភាព និងសុខភាពល្អ! នៅពេលនេះមនុស្សកាន់តែច្រើនត្រូវមានការស្វែងយល់ពីគ្នា និង ការចូលរួមចំណែក“ សេចក្តីស្រឡាញ់ និង ការយកចិត្តទុកដាក់” ដើម្បីជួយដល់មនុស្សដែលកំពុងត្រូវការជំនួយកាន់តែច្រើន។
ចំណែកឯបុគ្គលិករបស់ក្រុមហ៊ុនចិនមួយនៅកម្ពុជា បានសរសេរសារថា៖ “បងប្អូនជនរួមជាតិចិនដែលរស់នៅ និងធ្វើការនៅកម្ពុជា ត្រូវថែរក្សាពេលវេលាដ៏សំខាន់មួយនេះទ្វេឡើង។ យើងត្រូវតែចូលរួមចំណែកផ្ទាល់ខ្លួនដើម្បីអភិវឌ្ឍន៍ និងពង្រឹងចំណងមិត្តភាពចិន-កម្ពុជា។ ជាថ្មីម្តងទៀតខ្ញុំសូមជូនពរមិត្តភាពចិន-កម្ពុជា យូរអង្វែងជារៀងរហូត!"
China News Sevice ក៏បានដកស្រង់ខ្លឹមសារពីប្រព័ន្ធផ្សព្វផ្សាយនៅកម្ពុជាបានឲ្យដឹងថា នៅថ្ងៃទី៤ ខែកុម្ភៈ នៅពេលដែលចូលរួម ក្នុងកិច្ចប្រជុំកំពូលសម្ព័ន្ធសន្តិភាពពិភពលោក។សម្តេចហ៊ុន សែនបានសង្កត់ធ្ងន់ថា “មេរោគកូរ៉ូណាវីរុសប្រភេទថ្មីមិនគ្រាន់តែជាបញ្ហាសម្រាប់ប្រទេសចិនប៉ុណ្ណោះទេ ប៉ុន្តែក៏ជាបញ្ហារបស់ពិភពលោក។ រាជរដ្ឋាភិបាលកម្ពុជាប្រកាន់ជំហរមិនងាករេរលើបញ្ហាមេរោគកូរ៉ូណាវីរុសប្រភេទថ្មីនេះ។”
សម្តេចហ៊ុន សែន បានកោតសរសើរជាច្រើនលើកចំពោះវិធានការបង្ការ និងគ្រប់គ្រងយ៉ាងរហ័សនិងមានប្រសិទ្ធភាពរបស់រដ្ឋាភិបាលប្រទេសចិន ចំពោះការរីករាលដាលមេរោគ«កូរ៉ូណា» ហើយបានមានប្រសាសន៍ថា រាជរដ្ឋាភិបាល និង ប្រជាជនកម្ពុជានឹងប្រកាន់ជំហររឹងមាំជាមួយរដ្ឋាភិបាល និង ប្រជាជនចិន ចែករំលែកសុភមង្គលជាមួយគ្នា ចែករំលែកការលំបាកជាមួយគ្នា និង ធ្វើការរួមគ្នា ដើម្បីប្រយុទ្ធប្រឆាំងនឹងការរីករាលដាលជំងឺ។
ឯកអគ្គរដ្ឋទូតចិនប្រចាំនៅកម្ពុជា លោក Wang Wentian បានចាត់ទុក ប្រសាសន៍របស់សម្តេចនាយករដ្ឋមន្រ្តីហ៊ុន សែន ជាការឆ្លុះបញ្ចាំងពីការជឿជាក់ខ្ពស់របស់សម្តេច និង រាជរដ្ឋាភិបាលកម្ពុជា ចំពោះរដ្ឋាភិបាលប្រទេសចិន។ ប្រទេសចិន និងកម្ពុជាជាសហគមន៍ជោគវាសនាតែមួយ «ដកដង្ហើមរួមគ្នា និងរួមលំបាកជាមួយគ្នា» ពិតប្រាកដមែន៕