ព្រះសីហនុ៖ រដ្ឋបាលខេត្តព្រះសីហនុ បាននឹងកំពុងពិចារណាផ្តល់ការអនុញ្ញាតជូនចំពោះតែអ្នកដែលបានចាក់វ៉ាក់សាំងការពារជំងឺកូវីដ-១៩ ចំនួនពីរលើករួចរាល់ និងមានភាពចាំបាច់ត្រូវធ្វើដំណើរចេញចូលក្នុងខេត្តព្រះសីហនុតែប៉ុណ្ណោះ។នេះបើយោងតាមលោក ឃាង ភារម្យ អ្នកនាំពាក្យសាលាខេត្តព្រះសីហនុ។
លោក ឃាង ភារម្យ បានថ្លែងប្រាប់ស៊ីស៊ីថាមស៍ថា អាជ្ញាធរខេត្តព្រះសីហនុ នៅថ្ងៃទី៤មីនានេះ បានប្រកាសបិទខេត្តមិនឲ្យមានការចរាចរណ៍ចេញចូលរវាងខេត្តព្រះសីហនុ ក្នុងករណីមិនចាំបាច់។ហើយនៅពេលថ្មីៗនេះរាជរដ្ឋាភិបាលកម្ពុជាបានសម្រេចបន្ថែមហាមការចេញ-ចូលខេត្តវិធានការបិទខេត្តនេះនឹងចប់ឱសានុវាទនៅថ្ងៃទី ២០ មេសា ឆ្នាំ២០២១ខាងមុខនេះ។
បើតាមអ្នកនាំពាក្យដដែល នៅក្រោយពេលបម្រាមធ្វើដំណើរឆ្លងខេត្តរបស់រាជរដ្ឋាភិបាលបានបញ្ចប់ រដ្ឋបាលខេត្តព្រះសីហនុ បាននឹងកំពុងពិចារណាផ្តល់ការអនុញ្ញាតជូនចំពោះតែអ្នកដែលបានចាក់វ៉ាក់សាំងការពារជំងឺកូវីដ-១៩ ចំនួនពីរលើករួចរាល់ និងមានភាពចាំបាច់ត្រូវធ្វើដំណើរចេញចូលក្នុងខេត្តព្រះសីហនុ។
គួរបញ្ជាក់ថា ក្រោយមានការរកឃើញកាន់តែច្រើនទៅៗជារៀងរាល់ថ្ងៃ ចាប់តាំងពីផ្ទុះព្រឹត្តិការណ៍ឆ្លងក្នុងសហគមន៍នៃជំងឺកូវីដ១៩ កាលពីថ្ងៃទី២០កុម្ភៈមក អាជ្ញាធរខេត្តព្រះសីហនុ នៅថ្ងៃទី៤ មីនា ឆ្នាំ២០២១ បានប្រកាសបិទខេត្តមិនឲ្យមានការចរាចរណ៍ចេញចូលរវាងខេត្តព្រះសីហនុ និងខេត្ត រាជធានីផ្សេងទៀត។ វិធានការនេះ ត្រូវបានធ្វើឡើងទៅលើចំណុចសំខាន់ចំនួន ៣កន្លែង នៅព្រំប្រទល់រវាងខេត្តព្រះសីហនុ និងខេត្តកោះកុង ខេត្តកំពង់ស្ពឺ និង ខេត្តកំពត។
ខេត្តព្រះសីហនុ គិតត្រឹមថ្ងៃទី០៨ ខែមេសា ឆ្នាំ២០២១ យោងលទ្ធផលតេស្តសំណាកកូវីដ-១៩ នៅថ្ងៃទី០៧ ខែមេសា ឆ្នាំ២០២១ អ្នកវិជ្ជមានកូវីដ-១៩ ថ្មីមានចំនួន០៣នាក់ និងអ្នកជាសះស្បើយចំនួន៦៤នាក់ ដូច្នេះតុល្យការអ្នកជំងឺកូវីដ-១៩ ដែលកំពុងសម្រាកព្យាបាលមានចំនួន២១០នាក់៕
.JPG?1634100985)
