Cct850x100 1
1800px x h300px kh

ក្រុមហ៊ុនFood Pandaយល់ស្របតាមតាមការទាមទាររបស់ក្រុមសេវាដឹកជញ្ជូន ក្រោយមានការតវ៉ា

សង្គម
/
អ្នកយកព័ត៌មាន:
ឌី ចិន្ដា
/
ក្រុមបុគ្គលិកសេវាកម្មដឹកជញ្ជូន (Food Panda) ប្រមាណជាង៣០០នាក់ ធ្វើការទាមទារជាមួយក្រុមហ៊ុន កាលពីថ្ងៃទី០៤ ។ (រូបភាពដោយ៖ ស៊ីស៊ីថាមស៍)

ភ្នំពេញ៖ក្រុមហ៊ុនដឹកជញ្ចូនFood Pandaនៅភ្នំពេញ ធ្វើការយល់ស្របតាមគោលការណ៍១០ចំណុចរបស់ក្រុមសេវាដឹកជញ្ជូនជាង៣០០នាក់បានស្នើរសុំ ក្រោយពីបានស្ដាប់នូវការទាមទាររបស់តំណាងអ្នកដឹកជញ្ចូន និងការសម្របសម្រួលពីអាជ្ញាធរមកភាគីក្រុមហ៊ុន ឌីលីវើរី ហេរ៉ូ (ខេមបូឌា) ឯ.ក )(Food Panda)។ដូចនេះ ក្រុមហ៊ុន បានសម្រេចឯកភាពដោយរក្សា និងផ្ដល់ជូនតាមការស្នើរសុំរបស់តំណាងកម្មករតាមគោលការណ៍ចំនួន១០ចំណុចតាមដែលបានទាមទារ។

កាលពីឆ្នាំ២០២០ ដែលបុគ្គលិកដឹកជញ្ចូនក្រុមហ៊ុន ឌីលីវើរី ហេរ៉ូ (ខេមបូឌា) ឯ.ក )(Food Panda) ក៏បានធ្លាប់ទាមទារសុំតំឡើងតម្លៃជើងសារចំនួនពីរលើកមកហើយ ហើយនៅតែបន្តទាមទារជាលើកទីបីថែមទៀត ក្នុងការផ្ដល់តំលៃជើងសារដល់បុគ្គលិកដឹកជញ្ចូនឱ្យបានដូចដើមកំណត់របស់ក្រុមហ៊ុនដែលមានតម្លៃមួយជើងសារ។

បើតាមក្រុមបុគ្គលិកសេវាកម្មដឹកជញ្ជូន (Food Panda) ប្រមាណជាង៣០០នាក់ កាលពីថ្ងៃទី០៤ ខែមករា ឆ្នាំ២០២១នេះ បានបញ្ជាក់ថា ដំបូងឡើយបុគ្គលិកទាំងអស់ ទទួលបានប្រាក់កម្រៃជើងសារមួយលើកចំនួន ០.៧០ដុល្លា(៧០សេន) ជាតម្លៃដើមដែលក្រុមហ៊ុនបានកំណត់ឱ្យពេលចូលធ្វើការដំបូង។ កាលពីឆ្នាំ២០២០កន្លងទៅ ក្រុមហ៊ុនបានធ្វើការកាត់បន្ថយចុះថ្លៃមកនៅ០.៦០ដុល្លា(៦០សេន) ហើយបុគ្គលិកក៏បានចូលរួមធ្វើការទាមទារសុំតំឡើងថ្លៃជើងសារឱ្យនៅតម្លៃដើមដដែល តែក្រោយមកទៀត ក្រុមហ៊ុននៅតែបន្តចុះនៅត្រឹមតែ ០.៥០ដុល្លា(៥០សេន)ក្នុងមួយជើងសារទៀត។

នៅថ្ងៃទី០៤ ខែមករា ឆ្នាំ២០២១នេះ ក្នុងសាលប្រជុំទីតាំងក្រុមហ៊ុន ស្ថិតនៅអគារលេខ ៨៨ ភូមិ៧ សង្កាត់ទួលស្វាយព្រៃទី២ ខណ្ឌបឹងកេងកង រាជធានីភ្នំពេញ មានអ្នកចូលរួមកិច្ចប្រជុំដោះស្រាយបញ្ហានេះ មានដូចជា តំណាងក្រុមហ៊ុន Food Panda អាជ្ញាធរខណ្ឌបឹងកេងកង និងសង្កាត់ទួលស្វាយព្រៃទី២ តំណាងកម្មករ ក្រសួងការងារ និងបណ្ដុះបណ្ដាលវិជ្ជាជីវៈ។

តាមរយៈកំណត់ហេតុស្ដីពីកិច្ចប្រជុំដោះស្រាយករណីកូដកម្មនៅក្រុមហ៊ុន ឌីលីវើរី ហេរ៉ូ ( ខេមបូឌា) ឯ.ក (Food Panda) ដែលតំណាងអ្នកដឹកជញ្ជូន លោកស្រី ម៉ៅ និមល លោកស្រី ព្រំ ដាវ៉ាន់ លោក យស សិរីពិសិដ្ឋ លោក ណុប កុសល និងលោក សួស វណ្ណះ ដែលបានរាយការណ៍ដើម្បីឱ្យក្រុមហ៊ុនគោរពតាមគោលការណ៍ទាំង១០ចំណុចរួមមាន (១) តំលៃជើងសារដូចដើមកំណត់តាមការកំណត់របស់ក្រុមហ៊ុន (២) បន្ថែមម៉ោងដឹកជញ្ជូនឱ្យបានច្រើន (៣) ផ្ដល់លេខទូរសព្ទទំនាក់ទំនងពេល Rider មានបញ្ហា (៤) ពេលមានបញ្ហាកែតំលៃសូមផ្ដល់ដំណឹងជាមុន (៥) ត្រូវតំណាងសហជីព Rider (៦) កែសម្រួលបញ្ហា System (៧) សូមដៅទីតាំងហាងឱ្យបានត្រឹមត្រូវ (៨) សូមក្រុមហ៊ុនជួយសម្រួល Map ឆ្លងកាត់ទទ្លេនឹងផ្លូវទាល់ (៩) សូមកំណត់តំលៃគីឡូឱ្យបានច្បាស់លាស់ និង(១០) សូមឱ្យដោះស្រាយឱ្យបានឆាប់រហ័ស។

ក្រោយពីបានស្ដាប់នូវការទាមទាររបស់តំណាងអ្នកដឹកជញ្ចូន និងការសម្របសម្រួលពីអាជ្ញាធរមកភាគីក្រុមហ៊ុន ឌីលីវើរី ហេរ៉ូ (ខេមបូឌា) ឯ.ក )(Food Panda) បានបញ្ជាក់ថា ជូនក្រុមការងារចំរុះថា ដោយសារក្រុមហ៊ុន ខូចប្រព័ន្ធ System បានជាមានការយឺតយ៉ាវ។ ដូចនេះ ក្រុមហ៊ុន បានសម្រេចឯកភាពដោយរក្សា និងផ្ដល់ជូនតាមការស្នើរសុំរបស់តំណាងកម្មករតាមគោលការណ៍ចំនួន១០ចំណុចខាងលើ។

ក្រុមហ៊ុន ឌីលីវើរី ហេរ៉ូ (ខេមបូឌា) ឯ.ក )(Food Panda) បានធ្វើការស្នើរសុំពេលពិនិត្យកែប្រែប្រព័ន្ធ និងពិនិត្យមើលលើតំលៃសេវាឡើងវិញ និងផ្ដល់ដំណឹងជូនក្នុងរយៈពេលពីរសប្ដាហ៍ក្រោយ។ ចំណែកឯភាគីតំណាងអ្នកដឹកជញ្ជូន ក៏បានយល់ស្របតាមការស្នើរសុំរបស់ភាគីក្រុមហ៊ុន និងបានសន្យាថា ស្អែកក្រុមដឹកជញ្ជូននឹងត្រឡប់ចូលធ្វើការងារវិញ តាមវេនរៀងៗខ្លួន៕

Khcct banner

អត្ថបទទាក់ទង