ភ្នំពេញ៖ ក្រសួងមហាផ្ទៃសម្រេចអនុញ្ញាតឱ្យចេញ-ចូលបម្រើការងារវិញចំពោះថ្នាក់ដឹកនាំ និងមន្រ្តីនានាដែលបម្រើការងារនៅក្នុងបវរិវេណទីស្តីការក្រសួងមហាផ្ទៃ ហើយដែលបានបញ្ចប់ការធ្វើចត្តាឡីស័ក និងបានធ្វើតេស្តរោគវិនិច្ឆ័យរកវីរុសកូវីដ១៩លើកទី៣។ នេះបើតាមសេចក្តីប្រកាសរបស់ក្រសួងមហាផ្ទៃនៅថ្ងៃទី១៥ ខែធ្នូ ឆ្នាំ២០២០។
យោងតាមសេចក្តីប្រកាស ក្រសួងមហាផ្ទៃសម្រេចអនុញ្ញាតឱ្យថ្នាក់ដឹកនាំ មន្រ្តីរាជការស៊ីវិល មន្រ្តីនគរបាលជាតិ និងមន្រ្តីពន្ធនាគារ ចេញ-ចូលបម្រើការងារវិញនៅក្នុងបវិវេណទីស្តីការក្រសួងមហាផ្ទៃ ហើយថ្នាក់ដឹកនាំ និងមន្រ្តីទាំងនោះត្រូវតែបញ្ចប់ការធ្វើចត្តាឡីស័ក និងបានធ្វើតេស្តរោគវិនិច្ឆ័យរកវីរុសកូវីដ១៩លើកទី៣រួចរាល់ ដោយទទួលបានលផអវិជ្ជមានវីរុសកូវីដ១៩ ចាប់ពីថ្ងៃទី១៥ ខែធ្នូ ឆ្នាំ២០២០តទៅលើកលែងតែបុគ្គល ដែលត្រួវបន្តតាមដានត្រួតពិនិត្យសុខភាពដោយក្រសួងសុខាភិបាល។
សេចក្តីប្រកាសបន្តថា ក្នុងការចេញចូលបំពេញការងារក្នុងបរិវរណក្រសួងមហាផ្ទៃ អគ្គនាយកប្រធានចំណុះក្រសួងមហាផ្ទៃ ត្រូវចាត់ឱ្យធ្វើការវាស់កម្តៅ លាងសម្អាតដៃជាមួយទឹកអាល់កុលឬជែលអាល់កុល មុនចូលក្នុងអគារនីមួយៗ និងត្រូវអនុវត្តវិធានការការពារជំងឺកូវីដ១៩ ឱ្យបានត្រឹមត្រូវ និងហ្មត់ចត់ តាមគោលការណ៍ណែនាំរបស់ក្រសួងសុខាភិបាល ជាពីសេសពាក់ម៉ាស ការលាងសម្អាតដៃឱ្យបានញឹកញាប់ និងរក្សាគម្លាតសុវត្តិភាពចំពោះបុគ្គល។
ចំពោះថ្នាក់ដឹកនាំនិងមន្ត្រីនានាដែលបានធ្វើរោគនិវិច្ឆ័យរកវីរុសកូវីដ១៩ លើកទី២រួចរាល់ត្រូវបន្តធ្វើចត្តាឡីស័កឱ្យបានត្រឹមត្រូវ និងហ្មត់ចត់បំផុត ស្របតាមគោលការណ៍ណែនាំរបស់ក្រសួងសុខាភិបាល។ នេះបើតាមសេចក្តីប្រកាស។
គួរបញ្ជាក់ថា មកទល់ពេលនេះថ្នាក់ដឹកនាំ មន្រ្តីរាជការស៊ីវិល មន្រ្តីនគរបាលជាតិ និងមន្រ្តីពន្ធនាគារ ដែលមានការប៉ះពាល់ដោយផ្ទាល់ និងប្រយោលក្នុង«ព្រឹត្តិការណ៍សហគមន៍ ២៨ វិច្ឆិកា»បានបញ្ចប់ការធ្វើចត្តាឡីស័ក និងបានធ្វើរោគវិនិច្ឆ័យរកកូវីដ១៩លើកទី៣រួចរាល់ហើយ ជាមួយនឹងលទ្ធផលអវិជ្ជមានវីរុសកូវីដ១៩៕
