កម្ពុជានឹងមានថ្នាក់បរិញ្ញាបត្រជាន់ខ្ពស់ជាភាសាចិនដំបូងបង្អស់ក្នុងប្រវត្តិសាស្រ្តរបស់ខ្លួន

ភ្នំពេញ៖ រាជបណ្ឌិត្យសភាកម្ពុជាគ្រោងនឹងបង្កើតថ្នាក់បរិញ្ញាបត្រជាន់ខ្ពស់ជាភាសាចិនដំបូងបង្អស់ក្នុងប្រវត្តិសាស្រ្តកម្ពុជា ហើយថ្នាក់នេះនឹងបើកឲ្យមានដំណើរចូលរៀនក្នុងអំឡុងខែតុលា ឆ្នាំ២០២០។ នេះបើតាមការលើកឡើងរបស់ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា។

ឯកឧត្តម សុខ ទូច បានមានប្រសាសន៍ថា ការបង្កើតថ្នាក់បរិញ្ញាបត្រជាន់ខ្ពស់ជាភាសាចិនដំបូងបង្អស់នៅប្រទេសកម្ពុជា គឺក្នុងគោលបំណងបណ្តុះបណ្តាលកូនខ្មែរនូវផ្នែកគរុកោសល្យថ្នាក់ភាសាចិនទាក់ទងនឹងកិច្ចការស្រាវជ្រាវអំពីវប្បធម៌ខ្មែរ ជីវភាពរស់នៅ និងភាពសំខាន់នៅលើទឹកដីរបស់កម្ពុជាក្នុងវិស័យទេសចរណ៍ ដើម្បីទាញយកផលប្រយោជន៍ពីវិស័យនេះផងដែរ។

បើតាមឯកឧត្តម សុខ ទូច បានគូសបញ្ជាក់ថា សម្រាប់លក្ខខណ្ឌក្នុងការចូលរៀនថ្នាក់បរិញ្ញាបត្រជាន់ខ្ពស់ជាភាសាចិន គឺនិស្សិតត្រូវបញ្ចប់ថ្នាក់បរិញ្ញាបត្រផ្នែកភាសាចិន ទើបអាចមានសិទ្ធិចូលរៀនបន្តថ្នាក់បរិញ្ញាបត្រជាន់ខ្ពស់ជាភាសាចិននៅរាជបណ្ឌិត្យសភាកម្ពុជាបាន។

ឯកឧត្តម សុខ ទូច បានបន្តថា គម្រោងបណ្តុះបណ្តាលគរុកោសល្យថ្នាក់បរិញ្ញាបត្រជាន់ខ្ពស់ជាភាសាចិន ខាងរាជបណ្ឌិត្យសភាកម្ពុជានឹងរៀបចំដោយមានការឯកភាពពីខាងរាជរដ្ឋាភិបាល ក៏ដូចជាការសហការជាមួយនឹងក្រសួងអប់រំនៅប្រទេសចិន និងសាកលវិទ្យាល័យសៀងហៃ សាកលវិទ្យាល័យប៉េកាំង សាកលវិទ្យាល័យធានជីង ដើម្បីបង្កើតថ្នាក់បរិញ្ញាបត្រជាន់ខ្ពស់ជាភាសាចិននៅប្រទេសកម្ពុជា។

ជាមួយគ្នានោះ ឯកឧត្តម សុខ ទូច បានបញ្ជាក់ថា ភាសាចិននឹងក្លាយជាភាសាទីបីនៅប្រទេសកម្ពុជា ហើយនាពេលអនាគតនឹងមានការបណ្តាក់ទុនវិនិយោគចិនចូលមកកម្ពុជាច្រើន ដូច្នេះទាមទារឲ្យប្រជាពលរដ្ឋខ្មែរត្រូវចេះភាសាចិន ក៏ដូចជាភាសាបច្ចេកវិទ្យា និងជាពិសេសភាសាចិនដែលអាចឲ្យកូនខ្មែរយល់ច្បាស់ពីវប្បធម៌ខ្មែរ ជីវភាពរស់នៅ និងភាពសំខាន់នៅលើទឹកដីរបស់កម្ពុជាក្នុងវិស័យទេសចរណ៍ ដើម្បីទាក់ទាញភ្ញៀវទេសចរចិនមកលេងកម្សាន្តនៅប្រទេសកម្ពុជាកាន់តែច្រើន៕