ភ្នំពេញ៖ អាជ្ញាធរកម្ពុជា កំពុងតាមរកស្រ្តីខ្មែរ សញ្ជាតិអាមេរិកម្នាក ដែលរត់ចេញពីការធ្វើចត្តាឡីស័ករបស់មន្រ្តីសុខាភិបាល។ នេះបើតាមលោកជំទាវ ឱវណ្ណឌីន ក្នុងថ្ងៃ១៨ កក្កដា ឆ្នាំ២០២០។
ស្រ្តីជាជនជាតិខ្មែរ-អាមេរិក បានរត់ចេញពីការធ្វើចត្តាឡីស័កកាលពីយប់មុិញ នាពេលយប់រំលងអាធ្រាត ហើយមកដល់ពេកព្រឹកព្រលឹមម៉ោង៧ ក្រុមគ្រូពេទ្យយកម្ហូបអាហារពេលព្រឹកស្រ្តីរូបនេះ និងតាមដានសុខភាព តែមិនឃេីញក្នុងបន្ទប់តែម្តង។
លោកជំទាវឱវណ្ណ ឌីន បានមានប្រសាសន៍ថា ស្រ្តីដែលរួចរត់នេះគឺជាករណីពិតប្រាកដមែន ហើយមកទល់ពេលនេះសមត្ថកិច្ចកំពុងតែស្រាវជ្រាវរក ហេីយ។
លោកជំទាវបន្ថែមទៀតថា ស្រ្តីរូបនេះមានឈ្មោះ វីរ៉ា រូស( Vira Rose) កាន់ប៉ាស្ព័រសញ្ជាតិអាមេរិក ប្រភេទ P ហើយស្រ្តីរូបនេះមិនមានវិជ្ជមានកូវីដ១៩ទេ តែតម្រូវឱ្យធ្វើចត្តាឡីស័ករយៈពេល១៤ថ្ងៃសិន ហើយប្រសិនបើមានអ្នកប្រទះឃើញ អាចធ្វើការរាយការណ៍មកកាន់ក្រុមការងារនៃក្រសួងសុខាភិបាល និងមន្រ្តីមានសមត្ថកិច្ចជាបន្ទាន់។
សូមបញ្ជាក់ជូនថា ស្រ្តីរូបនេះជាអ្នកដំណើរក្នុងចំណោមអ្នកដំណើរចេញពីសហរដ្ឋអាមេរិក បន្តជើងហោះហើរនៅសាធារណៈរដ្ឋកូរ៉េ៕