ភ្នំពេញ៖ រាជរដ្ឋាភិបាលកម្ពុជា នៅថ្ងៃទី២៤ខាងមុខនេះ នឹងផ្ដល់ប្រាក់ឧបត្ថម្ភជូនដល់គ្រួសារក្រីក្រ និងងាយរងគ្រោះជាង៦០ម៉ឺនគ្រួសារ។ នេះបើតាមប្រសាសន៍សម្ដេចតេជោ ហ៊ុន សែន កាលថ្ងៃម្សិលមិញនេះ។
ថ្លែងក្នុងឱកាសចុះពិនិត្យការដ្ឋាន សាងសង់ព្រលានយន្តហោះនៅខេត្តកណ្តាល សម្ដេចតេជោ ហ៊ុន សែន មានប្រសាសន៍ថា៖« ថ្ងៃ២៤ខាងមុខនេះ ខ្ញុំនឹងប្រកាសដើម្បីឧបត្ថម្ភប្រមាណជាង៦០ម៉ឺនគ្រួសារ អំពីជំនួយជាសាច់ប្រាក់ សម្រាប់ប្រជាជនក្រីក្រ បន្ទាប់ពីកម្ពុជាបាននឹងកំពុងអភិវឌ្ឍ នៅការឧបត្ថម្ភចំពោះកម្មករដែលបាត់បង់ការងារធ្វើ ដែលរដ្ឋាភិបាលនឹងចំណាយ១ខែប្រមាណ ២៥លានដុល្លារជួយពលរដ្ឋក្រីក្រជាង៦០ម៉ឺនគ្រួសារដែលទទួលរងផលប៉ះពាល់ពីវិបត្តិកូវីដ១៩»។
សម្ដេចបន្ថែមថា ចំពោះកម្មការនីដែលឆ្លងទន្លេ និងស្រ្តីដែលមានផ្ទៃពោះ និងកម្មវិធីមួយចំនួនទៀត នឹងធ្វើការប្រកាសអំពីបញ្ហានេះបន្ថែមទៀតផងដែរ។
ដោយឡែកសម្រាប់លក្ខខណ្ឌ ដែលទទួលបានការឧបត្ថម្ភជាសាច់ប្រាក់ពីរដ្ឋាភិបាលកម្ពុជានេះ គឺប្រជាពលរដ្ឋជាគ្រួសារក្រីក្រនិងងាយរងគ្រោះ ដែលមានបណ្ណសមធម៌ និងដែលមានសុពលភាព ដោយឈរលើកម្រិតភាពក្រីក្រ៖ ក្រកម្រិត១ (ទីទ័លក្រ) ឬ ក្រកម្រិត២ (ក្រ) និងដែលបានទៅផ្ទៀងផ្ទាត់បញ្ជីឈ្មោះនៅតាមសាលាឃុំ/សង្កាត់រួចរាល់។
ជាក់ស្តែង ប្រជាពលរដ្ឋក្រីក្រនិងងាយរងគ្រោះនៅទីប្រជុំជនក្នុងរាជធានីភ្នំពេញ នឹងទទួលបានប្រាក់ឧបត្ថម្ភសម្រាប់គ្រួសារដែលមាន ប័ណ្ណសមធម៌ ប្រភេទ១ និងប្រភេទ២ ទាំងកម្រិត១និងកម្រិត២ ចំនួន ១២ ម៉ឺន រៀលក្នុង មួយ ខែ ខណៈសមាជិកគ្រួសារក្នុងម្នាក់ៗទទួលបានពី៣៦០០០រៀលទៅដល់ ៥២០០០ រៀល ។ បន្ថែមលើនេះ កុមារដែលមានអាយុពី០-៥ឆ្នាំ, ជនមានពិការភាព, មនុស្សចាស់អាយុ ចាប់ពី៦០ឆ្នាំឡើងទៅ និងគ្រួសារក្រីក្រដែលមានសមាជិកផ្ទុកមេរោគអេដស៍ ក៏ជាប្រភេទ មុខ សញ្ញាក្រុមជនគោលដៅដែលនឹងទទួលបានប្រាក់ឧបត្ថម្ភចន្លោះពី ១៦០០០ រៀល ឬពី ២៤០០០រៀល ទៅដល់៤០០០០រៀល នៅក្នុងម្នាក់ៗ។
សូមបញ្ជាក់ដែរថា យោងតាមអនុក្រឹត្យរបស់រដ្ឋាភិបាលកម្ពុជា ចុះថ្ងៃទី ១២ មិថុនា ប្រជាពលរដ្ឋក្រីក្រនិងងាយរងគ្រោះដែលនឹងត្រូវទទួលបានប្រាក់ឧបត្ថម្ភពីរដ្ឋាភិបាលកម្ពុជានេះ គឺបែង ចែក ទៅតាមកម្រិតក្រីក្រ និងទៅតាមតំបន់ផ្សេងៗគ្នា គឺតំបន់ទីប្រជុំជនក្នុងរាជធានីភ្នំពេញ តំបន់ទីប្រជុំជនក្រៅពីរាជធានីភ្នំពេញ និងតំបន់ជនបទ៕