កំពង់ធំ៖ផ្លូវជាតិលេខ៦ ចាប់ពីបង្គោលគីឡូម៉ែត្រលេខ ២២០ ដល់ ២២៤ ក្នុងភូមិត្រាច ឃុំកំពង់ចិនជើង និង ផ្លូវខេត្តលេខ ២៦៤ D និង ២៦៤ G នៅភូមិតាទ្រាយ ឃុំប្រឡាយ ស្រុកស្ទោង ខេត្តកំពង់ធំ ត្រូវបានសម្រេចផ្អាកធ្វើចរាចរណ៍ សម្រាប់រថយន្តដឹកទំនិញធុនធ្ងន់គ្រប់ប្រភេទ។ការផ្អាកធ្វើចរាចរណ៍នេះ ដោយសារតែស្ថានភាពផ្លូវកំពុងជន់លិចឡើងខ្លាំង ដោយជំនន់ទឹកភ្លៀង។
យោងតាមសេចក្តីជូនដំណឹងរបស់មន្ទីរសាធារណការ និងដឹកជញ្ជូន ខេត្តកំពង់ធំ បានពន្យល់ថា ដើម្បីបង្ការគ្រោះថ្នាក់ដោយយថាហេតុ និងខូចខាតរចនាសម្ព័ននៃផ្លូវទាំងនោះ មន្ទីសារធារណៈការ និងដឹកជញ្ជូនខេត្តកំពង់ធំ សម្រេចបិទការធ្វើចរាចរណ៍ ចំពោះរថយន្តដឹកទំនិញធុនធ្ងន់ គ្រប់ប្រភេទបណ្តោះអាសន្នចាប់ពីថ្ងៃទី២៦កញ្ញា តទៅ។
បើតាមសេចក្តីជូនដំណឹង ការផ្អាកចរចរណ៍សម្រាប់រថយន្តធុនធ្ងន់ នៅតំបន់ខាងលើនេះ នឹងអនុវត្តរហូតដល់អាជ្ញាធរចេញសេចក្តីជូនដំណឹងថ្មី៕
