អង់គ្លេស៖ បេសកជនចិនប្រចាំនៅចក្រភពអង់គ្លេសបានព្រមានថា ការជ្រៀតជ្រែករបស់អង់គ្លេស និង អាមេរិកលើបញ្ហាតៃវ៉ាន់អាចបណ្តាលឱ្យមានសង្គ្រាម ដោយអះអាងថា ទំនាក់ទំនងរបស់ទីក្រុងប៉េកាំងជាមួយចក្រភពអង់គ្លេសឥឡូវនេះកំពុងស្ថិតនៅផ្លូវបំបែក។
ថ្លែងប្រាប់កាសែត Guardian op-ed កាលពីថ្ងៃអង្គារ ឯកអគ្គរដ្ឋទូតចិនប្រចាំចក្រភពអង់គ្លេស លោក Zheng Zeguang បានផ្តល់ជំហររបស់រដ្ឋាភិបាលរបស់គាត់ចំពោះជម្លោះទឹកដី ខណៈដែលលោកបានប្រកាសថា តៃវ៉ាន់បានក្លាយជា "បញ្ហាដ៏ធំ" សម្រាប់ប្រទេសចិន សហរដ្ឋអាមេរិក និងចក្រភពអង់គ្លេសដូចគ្នា។ បេសកជនរូបនេះបានសរសេរថា ប៉ុន្មានឆ្នាំមកនេះ សហរដ្ឋអាមេរិកបាននឹងកំពុងយកតៃវ៉ាន់ធ្វើជាកូនអុក' ដើម្បីទប់ស្កាត់ការពង្រីកអំណាចរបស់ចិន។
លោក Zheng ក៏បានជំរុញឱ្យចក្រភពអង់គ្លេសជៀសវាងការដើរតាម "គន្លងរបស់សហរដ្ឋអាមេរិក" ដោយលើកឡើងពីដំណើរទស្សនកិច្ចនាពេលថ្មីៗនេះដោយសមាជិកសភាជាន់ខ្ពស់អាមេរិកទៅកាន់កោះតៃវ៉ាន់ ហើយបានកត់សម្គាល់ថាតៃវ៉ាន់នេះ "តែងតែជាបញ្ហារសើបនៅកណ្តាលនៃទំនាក់ទំនងរវាងចក្រភពអង់គ្លេស និងចិន"។
ការអត្ថាធិប្បាយរបស់ឯកអគ្គរដ្ឋទូត ធ្វើឡើងចំពេលមានសមយុទ្ធយោធាថ្មីរបស់ចិននៅលើអាកាស និងដែនទឹកជុំវិញកោះតៃវ៉ាន់ ដែលឆ្លុះបញ្ចាំងពីសមយុទ្ធមួយផ្សេងទៀតដែលបានធ្វើឡើងភ្លាមៗបន្ទាប់ពីដំណើរទស្សនកិច្ចទៅកាន់កោះតៃវ៉ាន់ដោយប្រធានសភាអាមេរិក Nancy Pelosi ។
ដោយឡែករដ្ឋមន្ត្រីការបរទេសចក្រភពអង់គ្លេសលោកស្រី Liz Truss ថ្មីៗនេះបានចាត់ទុកសមយុទ្ធយោធាចិនគឺជាការ "គំរាមកំហែងដល់សន្តិភាព និងស្ថិរភាពក្នុងតំបន់"។ លោក Zheng ក៏បានចោទប្រកាន់គូប្រជែងរបស់ចិនពីការរំខានដល់សន្តិភាពក្នុងតំបន់ដោយការព្យាយាមធ្វើអន្តរាគមន៍លើបញ្ហាតៃវ៉ាន់ ដោយព្រមានអំពី«ផលវិបាកធ្ងន់ធ្ងរ» ប្រសិនបើទីក្រុងឡុងហាន «ឆ្លងកាត់ខ្សែបន្ទាត់ក្រហមរបស់ភាគីចិន»។
ប្រទេសចិនចាត់ទុកកោះនេះជាផ្នែកមួយនៃទឹកដីរបស់ខ្លួន តៃវ៉ាន់ត្រូវបានគ្រប់គ្រងដោយស្វ័យភាពប្រកបដោយប្រសិទ្ធភាពចាប់តាំងពីសង្គ្រាមស៊ីវិលចិនក្នុងឆ្នាំ ១៩៤៩ នៅពេលដែលក្រុមជាតិនិយម Kuomintang ត្រូវបានកម្ចាត់ដោយកងកម្លាំងកុម្មុយនិស្តនៅលើដីគោក ហើយត្រូវបានបង្ខំឱ្យភៀសខ្លួន។ រដ្ឋបាលក្នុងតំបន់បានបន្តហៅកោះតៃវ៉ាន់នេះថាជា «សាធារណរដ្ឋចិន» រហូតមកទល់ពេលនេះ បើទោះជាវាត្រូវបានគេទទួលស្គាល់ជាផ្លូវការដោយប្រទេសបរទេសមួយចំនួនតូចក៏ដោយ៕
