វ៉ាស៊ីនតោន៖ ក្រសួងការពារជាតិអាមេរិកបានប្រកាសកញ្ចប់ជំនួយយោធាដ៏ធំបំផុតរបស់ខ្លួនសម្រាប់ទីក្រុងគៀវ ចាប់តាំងពីជម្លោះរុស្ស៊ី-អ៊ុយក្រែនបានចាប់ផ្តើមក្នុងខែកុម្ភៈ ដោយគ្រោងនឹងបន្ថែមទឹកប្រាក់ចំនួន ១ ពាន់លានដុល្លារក្នុងការដឹកជញ្ជូនអាវុធទៅកាន់ប្រទេសអ៊ុយក្រែន។
មន្រ្តីមន្ទីរបញ្ចកោណបានអះអាងថា កញ្ចប់សព្វាវុធចុងក្រោយបំផុតត្រូវបានអនុម័តក្រោមអ្វីដែលហៅថា "អាជ្ញាធរដកថយ" របស់ប្រធានាធិបតី Joe Biden ដែលជាកញ្ចប់ទី ១៨ សម្រាប់អ៊ុយក្រែន ដោយនឹងរួមបញ្ចូលគ្រាប់រំសេវជាច្រើនទៀតសម្រាប់ប្រព័ន្ធបាញ់មីស៊ីល High Mobility Artillery Rocket System (HIMARS) ដែលអាមេរិកធ្លាប់បានបញ្ជូនទៅកាន់អ៊ុយក្រែន ក៏ដូចជាមីស៊ីលប្រឆាំងរថក្រោះ Javelin ចំនួន ១,០០០ គ្រាប់ គ្រឿងផ្ទុះជាច្រើនម៉ឺនគ្រាប់ទៀត។ មន្ទីរបញ្ចកោណក៏មានគម្រោងផ្តល់រថយន្តព្យាបាលពាសដែកចំនួន ៥០ គ្រឿង រួមទាំងសម្ភារ និងសម្ភារៈពេទ្យជាច្រើនទៀតដល់អ៊ុយក្រែន។
លោក Biden បានយល់ព្រមលើជំនួយយោធាប្រហែល ៩,៨ ពាន់លានដុល្លារដល់ទីក្រុង គៀវ ចាប់តាំងពីលោកបានចូលកាន់តំណែងក្នុងខែមករា ឆ្នាំ ២០២១ រួមទាំង $៩ ពាន់លានដុល្លារចាប់តាំងពីរថក្រោះរុស្ស៊ីបានរមៀលឆ្លងកាត់ព្រំដែនអ៊ុយក្រែន។ សភាបានអនុម័តទឹកប្រាក់ចំនួន ៤០ ពាន់លានដុល្លារជាជំនួយថ្មីសរុបដល់អ៊ុយក្រែនកាលពីខែឧសភា បន្ទាប់ពីបានផ្តល់ ១៣.៦ ពាន់លានដុល្លារពីមុនមក។
មន្ទីរបញ្ចកោណបាននិយាយថា "ដើម្បីបំពេញតាមតម្រូវការសមរភូមិដែលកំពុងវិវឌ្ឍន៍របស់អ៊ុយក្រែន សហរដ្ឋអាមេរិកនឹងបន្តធ្វើការជាមួយសម្ព័ន្ធមិត្ត និងដៃគូរបស់ខ្លួន ដើម្បីផ្តល់ឱ្យអ៊ុយក្រែននូវជំនួយបន្ថែមទៀតសម្រាប់ការបន្តទប់ស្កាត់ការឈ្លានពានរបស់រុស្សី"។
មន្ត្រីអ៊ុយក្រែនបានសរសើរពីប្រសិទ្ធភាពនៃប្រព័ន្ធ HIMARS ដែលផលិតដោយសហរដ្ឋអាមេរិក ដោយហៅវាថាជា "សព្វាវុធដ៏សាហាវមួយ" នៅលើសមរភូមិ។ ទោះបីជាយ៉ាងណាក៏ដោយ ក្រសួងការពារជាតិរុស្ស៊ីបានអះអាងថា ខ្លួនបានបំផ្លាញសព្វាវុធ HIMARS ចំនួន ៦ ក្នុងចំណោម ១៦ គ្រឿង ដែលអាមេរិកបានបញ្ជូនទៅកាន់អ៊ុយក្រែន ក៏ដូចជាឃ្លាំងផ្ទុកគ្រាប់រំសេវផងដែរ៕
