Foton on ads news final
Cct850x100 1
Cc time 1800 x 300
San house

កម្ពុជាស្នើឱ្យនីហ្សេរីយ៉ាពិចារណានាំចូលទំនិញបន្ថែមពីកម្ពុជាក្រៅពីទំនិញសក្តានុពល

សេដ្ឋកិច្ច
/
អ្នកយកព័ត៌មាន:
ហួ ឆេងស៊ីម
/
(រូបភាព៖ ក្រសួងពាណិជ្ជកម្ម)

ភ្នំពេញ៖ ក្រសួងពាណិជ្ជកម្មកម្ពុជា ស្នើឱ្យភាគីនីហ្សេរីយ៉ាពិចារណានាំចូលទំនិញបន្ថែមពីកម្ពុជាក្រៅពីទំនិញសក្តានុពលដែលកម្ពុជានាំចេញទៅកាន់ពិភពលោក(សម្លៀកបំពាក់,ស្បែកជើង,កង់,សម្ភារៈធ្វើដំណើរ) រួមមាន៖ អង្ករ ដំឡូងមី ផ្លែមៀន ស្វាយ និងមុខទំនិញដទៃទៀត។ ការស្នើនេះត្រូវបានធ្វើឡើងនៅក្នុងជំនួបពិភាក្សាការងាររវាងឯកឧត្ដម ឱក ប៊ុង រដ្ឋលេខាធិការក្រសួងពាណិជ្ជកម្ម ជាមួយលោកជំទាវ Folakemi I. Akinleye ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋសហព័ន្ធនីហ្សេរីយ៉ា នៅថ្ងៃទី២៦ ខែកក្កដា ឆ្នាំ២០២២។

នៅក្នុងឱកាសនវ លោកជំទាវ Folakemi I. Akinleye បានឱ្យដឹងថា បច្ចុប្បន្ននេះនីហ្សេរីយ៉ាកំពុងប្រឈមមុខនឹងកង្វះការផ្គត់ផ្គង់ស្បៀងអាហារ ដែលបណ្តាលមកពីវិបត្តិសង្រ្គាមរុស្ស៊ី-អ៊ុយក្រែន និងស្នើភាគីទំាងពីរធ្វើការជិតស្និទ្ធជាមួយគ្នា ដើម្បីពង្រីកកិច្ចសហប្រតិបត្តិការទ្វេភាគីឱ្យកាន់តែល្អប្រសើរឡើង ជាពិសេសលើវិស័យពាណិជ្ជកម្ម និងសេដ្ឋកិច្ច។

ជាកិច្ចឆ្លើយតប ឯកឧត្តម ឱក ប៊ុង បានលើកឡើងថា ទំហំពាណិជ្ជកម្មរវាងកម្ពុជា-នីហ្សេរីយ៉ា នៅមានទំហំតិចតួចនៅឡើយ ដែលមានឱកាសដើម្បីជំរុញនិងពង្រីកពាណិជ្ជកម្មទ្វេភាគីបន្ថែមនាពេលខាងមុខ តាមរយៈការបង្កើនការដោះដូរមុខទំនិញសំខាន់ៗ និងការវិនិយោគលើវិស័យសក្តានុពលរវាងភាគីទាំងពីរ។

ឯកឧត្តម បានបន្ថែមថា កម្ពុជាស្វាគមនរាល់វិនិយោគិន និងធុរជនបរទេសដែលមកបណ្ដាក់ទុននៅកម្ពុជា រួមទាំងវិនិយោគិននីហ្សេរីយ៉ាផងដែរ ក្នុងនោះរាជរដ្ឋាភិបាលកម្ពុជាមាននីតិវិធីងាយស្រួល ដែលបម្រើដល់សកម្មភាពធ្វើធុរកិច្ច និងវិនិយោគនៅកម្ពុជា។ ក្នុងឱកាសនេះ ឯកឧត្តម បានធ្វើបទបង្ហាញសង្ខេបស្តីពីវឌ្ឍនភាពសេដ្ឋកិច្ចនិងពាណិជ្ជកម្មកម្ពុជាពីឆ្នាំ១៩៩៣ ដល់បច្ចុប្បន្ន ជូនលោកជំទាវឯកអគ្គរដ្ឋទូត។

តាមរយៈបទបង្ហាញនេះ លោកជំទាវឯកអគ្គរដ្ឋទូត មានចំណាប់អារម្មណ៍ទាក់ទងការអភិវឌ្ឍន៍នៅតំបន់សេដ្ឋកិច្ចពិសេស, កសិកម្ម និងវិនិយោគ និងបានស្នើភាគីទាំងពីរពង្រឹងទំនាក់ទំនងពាណិជ្ជកម្ម-វិនិយោគ តាមរយៈការពិនិត្យលទ្ធភាពវិនិយោគរួមគ្នាលើវិស័យអាទិភាព ដើម្បីបម្រើសេចក្តីត្រូវការទៅវិញទៅមក និងការដោះដូរពាណិជ្ជកម្មទ្វេភាគី។

ជាកិច្ចឆ្លើយតប ឯកឧត្ដមរដ្ឋលេខាធិការ គាំទ្រលើសំណើនេះ ដែលភាគីទាំងពីរគួរធ្វើការរួមគ្នាដើម្បីពង្រីកពាណិជ្ជកម្មនិងវិនិយោគទ្វេភាគី និងស្នើឱ្យភាគីនីហ្សេរីយ៉ាពិចារណានាំចូលទំនិញបន្ថែមពីកម្ពុជាក្រៅពីទំនិញសក្តានុពលដែលកម្ពុជានាំចេញទៅកាន់ពិភពលោក(សម្លៀកបំពាក់,ស្បែកជើង,កង់,សម្ភារៈធ្វើដំណើរ) រួមមាន៖ អង្ករ ដំឡូងមី ផ្លែមៀន ស្វាយ និងមុខទំនិញដទៃទៀត។

ឯកឧត្តម បានស្នើឱ្យមានដំណើរទស្សនកិច្ចផ្លាស់ប្តូរបទពិសោធន៍គ្នាទៅវិញទៅមក ទាំងស្ថាប័នរដ្ឋនិងឯកជននីហ្សេរីយ៉ាទាំងកម្រិតរដ្ឋមន្ត្រី និងថ្នាក់មន្ត្រីបច្ចេកទេស ដើម្បីស្វែងយល់ពីបរិយាកាសធុរកិច្ច និងវិនិយោគ និងវិស័យសក្តានុពលគួរវិនិយោគរវាងប្រទេសទាំងពីរ។

គួរបញ្ជាក់ថា ទំហំពាណិជ្ជកម្មរវាងកម្ពុជា-នីហ្សេរីយ៉ា ក្នុងឆ្នាំ២០១៨ (នាំចេញ ៥៩៧ ពាន់ដុល្លារ, នាំចូល ៥៣៥ ពាន់ដុល្លារ), ឆ្នាំ២០១៩(នាំចេញ ២៤៦ ពាន់ដុល្លារ, នាំចូល ៥០២ ពាន់ដុល្លារ), ឆ្នាំ២០២០ (នាំចេញ ៤៦៤ ពាន់ដុល្លារ, នាំចូល ៣៥ ពាន់ដុល្លារ), ឆ្នាំ២០២១ (នាំចេញ ១៥៣ ពាន់ដុល្លារ, នាំចូល ៣៥៧ ពាន់ដុល្លារ) និងឆ្នាំ២០២២ (៦ខែដើមឆ្នាំ) (នាំចេញ ១២២ ពាន់ដុល្លារ, នាំចូល ១៩៩ ពាន់ដុល្លារ) ទំហំពាណិជ្ជកម្មទ្វេភាគីក្នុងឆ្នាំ២០២១ កើនឡើង ២% ធៀបនឹងឆ្នាំ២០២០។ នេះបើតាមរបាយការណ៍របស់ក្រសួងពាណិជ្ជកម្ម៕


Khcct banner

អត្ថបទទាក់ទង