វ៉ាស៊ីនតោន៖ រដ្ឋមន្ត្រីការបរទេសអាម៉េរិក លោក Antony Blinken បានថ្កោលទោសការប្រហារជីវិតអ្នកទោស៤នាក់ របស់របបយោធាមីយ៉ាន់ម៉ាថាជាការប្រមាថ នឹងជាការរំលោភសិទ្ធិមនុស្សព្រមទាំងប្រជាធិបតេយ្យ។ ការថ្កោលទោសនេះធ្វើឡើងភ្លាមៗបន្ទាប់ពីរបបលោក មីន អ៊ុងឡាំងបានសម្លាប់អ្នកប្រជាធិបតេយ្យ៤នាក់កាលពីម្សិលមិញ។
លោក Blinken អះអាងថាការប្រហារជីវិតអតីតសមាជិកសភា សកម្មជនលេចធ្លោ និងពីរនាក់ផ្សេងទៀតថា «អំពើហឹង្សាដ៏គួរឱ្យស្អប់ខ្ពើមទាំងនេះ បង្ហាញឱ្យឃើញនូវការមិនយកចិត្តទុកដាក់ទាំងស្រុងរបស់របបនេះចំពោះសិទ្ធិមនុស្ស និងនីតិរដ្ឋ»។លោក Blinken បន្ថែមថា «ការកាត់ក្តីក្លែងបន្លំ និងការប្រហារជីវិតរបស់របបនេះ គឺជាការប៉ុនប៉ងយ៉ាងម៉ឺងម៉ាត់ ដើម្បីពន្លត់លទ្ធិប្រជាធិបតេយ្យ សកម្មភាពទាំងនេះនឹងមិនដែលបង្អាក់ស្មារតីនៃប្រជាជនភូមាដ៏ក្លាហាននោះទេ» ហើយថែមទាំងជំរុញឲ្យប្រជាជនក្នុងស្រុកបន្តងើបបះបោលថែមទៀតផង។
ជាមួយគ្នានេះដែរសហរដ្ឋអាមេរិកបានចូលរួមជាមួយប្រជាជនភូមាក្នុងការស្វែងរកសេរីភាព និងលទ្ធិប្រជាធិបតេយ្យ ហើយអំពាវនាវឱ្យរបបនេះគោរពនូវសេចក្តីប្រាថ្នាប្រជាធិបតេយ្យរបស់ប្រជាជន ដែលបានបង្ហាញថាពួកគេមិនចង់រស់នៅក្រោមរបបដឹកនាំដោយយោធា"បែបផ្តាច់ការឡើយ។
សហរដ្ឋអាមេរិកបានបញ្ចេញទណ្ឌកម្មជាបន្តបន្ទាប់ចាប់តាំងពីយោធាមីយ៉ាន់ម៉ាបានផ្តួលរំលំរបបដឹកនាំស៊ីវិលរបស់លោកស្រី Aung San Suu Kyi កាលពីខែកុម្ភៈឆ្នាំមុន ដោយបានបិទទ្វារលើកិច្ចខិតខំប្រឹងប្រែងដែលគាំទ្រដោយសហរដ្ឋអាមេរិកមួយទសវត្សរ៍ឆ្ពោះទៅរកលទ្ធិប្រជាធិបតេយ្យ។ Blinken កាលពីដើមខែនេះ បានជួបសកម្មជនមកពីប្រទេសមីយ៉ាន់ម៉ានៅទីក្រុងបាងកក ហើយបានទទួលស្គាល់ថាមានការរីកចម្រើនតិចតួច ប៉ុន្តែបានប្តេជ្ញាថាសហរដ្ឋអាមេរិកនឹងរក្សាសម្ពាធ។
អ្នកនាំពាក្យក្រសួងការបរទេសអាម៉េរិកលោក Ned Price បានប្រាប់អ្នកសារព័ត៌មានថា សហរដ្ឋអាមេរិកកំពុងពិភាក្សាអំពីវិធានការថ្មី ហើយថា "ជម្រើសទាំងអស់គឺនៅលើតុ" សម្រាប់សម្ពាធសេដ្ឋកិច្ចបន្ថែមទៅមីយ៉ាន់ម៉ា។ លោកបានអំពាវនាវឱ្យប្រជាជាតិទាំងអស់រួបរួមគ្នាលើប្រទេសមីយ៉ាន់ម៉ា ដោយនិយាយថា ការប្រហារជីវិតរបស់របបយោធាគឺជាការស្តីបន្ទោសដោយផ្ទាល់ចំពោះសមាគមប្រជាជាតិអាស៊ីអាគ្នេយ៍ និងជាប្រធានបច្ចុប្បន្នរបស់ប្រទេសកម្ពុជា៕
