សីតុណ្ហភាពខ្ពស់ធ្វើឲ្យភ្លើងឆេះព្រៃក្នុងប្រទេសជាច្រើននៅអឺរ៉ុបខាងត្បូង

អឺរ៉ុប៖ រលកកំដៅដ៏កម្រមួយ បានបោកបក់ពាសពេញទ្វីបអឺរ៉ុបភាគខាងត្បូង ធ្វើឲ្យប្រទេសជាច្រើនដូចជា អេស្ប៉ាញ ព័រទុយហ្គាល់ អ៊ីតាលី និងក្រិក ក៏កំពុងប្រយុទ្ធនឹងភ្លើងឆេះព្រៃដ៏អាក្រក់បំផុត។

ជិតទីក្រុង Bordeaux ប្រទេសបារាំង ភ្លើងឆេះព្រៃកាន់តែខ្លាំង ដែលបណ្តាលឲ្យមនុស្សរាប់ម៉ឺននាក់ ត្រូវបានជម្លៀសចេញ គិតត្រឹមថ្ងៃទី ១៧។ DPA បានដកស្រង់សេចក្តីថ្លែងការណ៍របស់រដ្ឋាភិបាលក្នុងតំបន់បាននិយាយថា ភ្លើងឆេះព្រៃនៅក្នុងតំបន់ Teste-de-Buch បានឆាបឆេះផ្ទៃដីចំនួន ១០,៥០០ ហិកតា ចាប់តាំងពីវាបានផ្ទុះឡើងកាលពីថ្ងៃទី ១២ កក្កដា ។ ភ្លើងឆេះព្រៃនេះ បានបន្តកាន់តែខ្លាំងជាមួយខ្យល់ដែលបង្កការគំរាមកំហែងដល់កន្លែងបោះជំរុំជាច្រើនកន្លែង។ អ្នកស្រុកនិងអ្នកទេសចរជាង ១៤,០០០ នាក់ត្រូវបានបង្ខំឱ្យជម្លៀសចេញ។

នៅរសៀលថ្ងៃទី ១៧ នេះ ភ្លើងឆេះព្រៃបានឆាបឆេះនៅចម្ងាយប្រហែល ៥០ គីឡូម៉ែត្រខាងជើងទីក្រុង Barcelona ប្រទេសអេស្ប៉ាញ បានរាលដាលដល់ផ្ទៃដីព្រៃឈើប្រមាណ ១០០០ ហិកតា ក្នុងរយៈពេល ៦ ម៉ោង បណ្តាលឲ្យខូចខាតផ្ទះសម្បែង និងយានយន្តមួយចំនួន។ លោក Joan Elena រដ្ឋមន្ត្រីមហាផ្ទៃបាននិយាយថា មនុស្សប្រហែល ២០០ នាក់ត្រូវបានជម្លៀសដោយសុវត្ថិភាព។

នៅប្រទេសព័រទុយហ្គាល់ នាយកដ្ឋានពន្លត់អគ្គីភ័យកំពុងតស៊ូដើម្បីគ្រប់គ្រងភ្លើងឆេះព្រៃចំនួន ១៦។ ICNF ដែលជាទីភ្នាក់ងារអភិរក្សធម្មជាតិ ដែលមានមូលដ្ឋាននៅទីក្រុង Lisbon បាននិយាយថា ភ្លើងបានបំផ្លាញព្រៃឈើចំនួន ៣០,០០០ ហិកតាក្នុងមួយសប្តាហ៍។ យន្តហោះពន្លត់អគ្គិភ័យមួយគ្រឿងបានធ្លាក់ក្នុងបេសកកម្មនៅភាគឦសានកាលពីថ្ងៃទី១៥ បណ្ដាលឲ្យអ្នកបើកបរបានស្លាប់។

ភ្លើងឆេះព្រៃបានកើតឡើងនៅតំបន់ជាច្រើនក្នុងប្រទេសអ៊ីតាលី។ ពិសេសទីក្រុងស៊ីស៊ីលី បានរងការវាយប្រហារដោយអាកាសធាតុស្ងួតខ្លាំងក្នុងរយៈពេលប៉ុន្មានសប្តាហ៍ថ្មីៗនេះ ដោយភ្លើងឆេះព្រៃចំនួនបីបានផ្ទុះឡើងនៅក្នុងទីតាំងចំនួនបីក្នុងពេលតែមួយ។ នាយកដ្ឋានពន្លត់អគ្គីភ័យបានបញ្ជូនយន្តហោះពីរគ្រឿង និងឧទ្ធម្ភាគចក្រមួយគ្រឿង ដើម្បីពន្លត់ភ្លើង។

នៅប្រទេសក្រិក នាយកដ្ឋានពន្លត់អគ្គីភ័យបានទទួលរបាយការណ៍ចំនួន ១១៩ នៃភ្លើងឆេះព្រៃក្នុងរយៈពេល ២៤ ម៉ោង។ នាយកដ្ឋានការពារជនស៊ីវិល បាននិយាយនៅលើប្រព័ន្ធផ្សព្វផ្សាយសង្គមថា ឧបទ្ទវហេតុនេះបានកើតឡើងនៅថ្ងៃទី ១៨ នៅក្នុងតំបន់ Attica ក្បែររដ្ឋធានី Athens, Evia, Crete, Lesvos, Samos និងភាគឦសាននៃ Peloponnese ដែលហានិភ័យនៃភ្លើងឆេះព្រៃនៅតែមានកម្រឹតខ្ពស់៕