ទន្លេចំនួន ៤៨៧ នៅទូទាំងប្រទេសចិបានឡើងលើសពីកម្រិតប្រកាសអាសន្ន

ចិន៖ មន្ត្រីម្នាក់បាននិយាយនៅថ្ងៃសុក្រថា ទន្លេសរុបចំនួន ៤៨៧ នៅទូទាំងប្រទេសចិនបានកើនលើសពីកម្រិតប្រកាសអាសន្ន បន្ទាប់ពីទឹកជំនន់បានកើតឡើងជាបន្តបន្ទាប់នៅឆ្នាំនេះ។

លោក Zhou Xuewen អគ្គលេខាធិការនៃទីស្នាក់ការកណ្តាលគ្រប់គ្រងទឹកជំនន់ជាតិ និងសង្គ្រោះគ្រោះរាំងស្ងួត បាននិយាយថា «ចាប់តាំងពីដើមរដូវទឹកជំនន់មក មានព្យុះភ្លៀងក្នុងតំបន់ចំនួន ១៨ នៅក្នុងប្រទេសចិន។ ឆ្នាំនេះទឹកជំនន់ឡើងលើសពីកម្រិតប្រកាសអាសន្ននៅក្នុងទន្លេចំនួន ៤៨៧ នៅទូទាំងប្រទេស។ ក្នុងចំណោមនោះ ទន្លេចំនួន ៤០ បានឃើញទឹកជំនន់លើសពីកម្រិតធានាសុវត្ថិភាព ហើយទន្លេចំនួន ១៣ ទៀតបានកើនឡើងដល់កម្រិតខ្ពស់បំផុតក្នុងប្រវត្តិសាស្ត្រ»។

ចាប់តាំងពីដើមឆ្នាំនេះមក មនុស្សចំនួន ២១.៨០៥ លាននាក់បានរងផលប៉ះពាល់ដោយទឹកជំនន់ និងបានបណ្តាលឱ្យមានការខាតបង់សេដ្ឋកិច្ចដោយផ្ទាល់ចំនួន ៦៤.៧៦ ពាន់លានយ័ន (ប្រហែល ៩.៦៦ ពាន់លានដុល្លារ) ។

គណៈកម្មការជាតិសម្រាប់ការកាត់បន្ថយគ្រោះមហន្តរាយ ក្រសួងគ្រប់គ្រងគ្រាអាសន្ន និងរដ្ឋបាលបម្រុងស្បៀងអាហារនិងយុទ្ធសាស្ត្រជាតិ បានបញ្ជូនទឹកប្រាក់ប្រហែល ២៤.៧៩ លានយ័ន (ប្រហែល ៣.៧០ លានដុល្លារអាមេរិក) នៃការគ្រប់គ្រងទឹកជំនន់ និងការផ្គត់ផ្គង់ជំនួយដល់តំបន់រងគ្រោះដោយគ្រោះមហន្តរាយ។

យោងតាមមន្ត្រីបានឲ្យដឹងថា មនុស្សប្រហែល ១.២៣៩ លាននាក់ត្រូវបានជម្លៀស ឬផ្លាស់ទីលំនៅដោយសារទឹកជំនន់ចាប់តាំងពីដើមឆ្នាំនេះ។ ពិសេសទឹកជំនន់បានបណ្តាលឲ្យមនុស្ស ៤០ នាក់បានស្លាប់ និងអ្នកផ្សេងទៀតបានបាត់ខ្លួន។

នាយកដ្ឋានគ្រប់គ្រងគ្រាអាសន្ន បានបញ្ជូនបុគ្គលិកចំនួន ៥៦,២០០ នាក់ និងជម្លៀសមនុស្សចំនួន ៣១,២០០ នាក់បានជាប់ក្នុងទឹកជំនន់៕