នៅក្នុងសប្តាហ៍នេះ (៤-១០ ខែ កក្កដា) វារីវប្បករកម្ពុជាដែលជាសមាជិកសមាគមវារីវប្បករនៅកម្ពុជា (អ្នកបង្កាត់ពូជត្រី និងអ្នកផលិតកូនត្រី) បានទៅធ្វើទស្សនកិច្ចសិក្សានៅប្រទេសវៀតណាម ពិសេសទៅរៀនសូត្រអំពីបច្ចេកទេសផលិតកូនត្រីនៅសាកលវិទ្យាល័យកាន់ថឺ ទីក្រុងកាន់ថឺ តំបន់ដីសណ្តទន្លេមេគង្គ ភាគខាងត្បូងប្រទេសវៀតណាម ក្រោមការគាំទ្រថវិកាដោយគម្រោងខាស់ (CAST) និងសមាគមសណ្តែកសៀងអាមេរិក (ASA)។
បើតាមសមាគមវារីវប្បករកម្ពុជា បញ្ជាក់ថា នេះជាឱកាសដ៏ល្អវិសេសវិសាលមួយ ដែលបងប្អូនវារីវប្បករអាចរៀនបច្ចេកទេសផង និងទៅមើលដំណើរការផ្ទាល់ផង។ នៅពេលត្រលប់មកវិញ បងប្អូនវារីវប្បករអាចពង្រឹងសមត្ថភាពក្នុងការបង្កាត់ និងផលិតកូនត្រីឱ្យកាន់តែមានគុណភាពល្អ និងបរិមាណច្រើន ក្នុងតម្លៃប្រកួតប្រជែងនៅលើទីផ្សារ។ ទន្ទឹមនេះ សមាគមវារីវប្បករនៅកម្ពុជា បានថ្លែងអំណរគុណជាខ្លាំងដល់ប្រជាកសិករអាមេរិក ដែលជួយដល់វារីវប្បករកម្ពុជា៕
