FCC អំពាវនាវឱ្យ Apple និង Google «ដកTikTokចេញពីកម្មវិធីរបស់ពួកគេ»

អាម៉េរិក៖ គណៈកម្មការទូរគមនាគមន៍សហព័ន្ធអាម៉េរិក (FCC) កំពុងបន្តការអំពាវនាវឱ្យ Apple និង Google ដក TikTok ចេញពីកម្មវិធីរបស់ពួកគេ ដោយលើកឡើងពីកង្វល់សន្តិសុខជាតិ ជុំវិញក្រុមហ៊ុនមេ ByteDance ដែលមានមូលដ្ឋាននៅប្រទេសចិន។

នៅក្នុងលិខិតមួយកាលពីថ្ងៃទី ២៤ ខែមិថុនា ទៅកាន់នាយកប្រតិបត្តិរបស់ក្រុមហ៊ុន Apple និង Google គណៈកម្មការទូរគមនាគមន៍សហព័ន្ធអាម៉េរិកលោក Brendan Carr បានពណ៌នា ក្រុមហ៊ុមមេ ByteDance ថាជា "អ្នកឃ្លាំងមើល" ឲ្យរដ្ឋាភិបាលចិន ដែលតម្រូវឲ្យអនុវត្តតាមច្បាប់របស់ចិន។

លោក Carr បានលើកឡើងបែបនេះ ក្រោយរបាយការណ៍របស់ BuzzFeed News ថ្មីៗនេះថា បុគ្គលិកចិនរបស់ក្រុមហ៊ុនមេ ByteDance បានចូលប្រើទិន្នន័យអ្នកប្រើប្រាស់ TikTok របស់សហរដ្ឋអាមេរិកជាច្រើនលើក។ លោកបានចោទប្រកាន់ TikTok ថា «មិនអនុលោមតាមគោលការណ៍ដែលក្រុមហ៊ុនរបស់ Apple និង Google តម្រូវឱ្យគ្រប់កម្មវិធីប្រកាន់ខ្ជាប់»។

Apple និង Google មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។ នៅក្នុងសេចក្តីថ្លែងការណ៍មួយ TikTok បានហៅរបាយការណ៍ BuzzFeed ថាជាការយល់ច្រឡំ។ TikTok បាននិយាយថា «ដូចក្រុមហ៊ុនសកលជាច្រើនដែរ TikTok មានក្រុមវិស្វកម្មនៅជុំវិញពិភពលោក»។

TikTok បានអះអាងថា «យើងប្រើការគ្រប់គ្រង ការចូលប្រើ ដូចជាការអ៊ិនគ្រីប និងការត្រួតពិនិត្យសុវត្ថិភាព ដើម្បីការពារទិន្នន័យអ្នកប្រើប្រាស់ ហើយដំណើរការអនុម័តការចូលប្រើ គឺត្រូវបានត្រួតពិនិត្យដោយក្រុមសន្តិសុខ ដែលមានមូលដ្ឋាននៅសហរដ្ឋអាមេរិក»។ TikTok រក្សាបានយ៉ាងខ្ជាប់ខ្ជួនថា «វិស្វកររបស់ខ្លួននៅក្នុងទីតាំងនៅខាងក្រៅសហរដ្ឋអាមេរិក រួមទាំងប្រទេសចិន អាចត្រូវបានផ្តល់សិទ្ធិចូលប្រើទិន្នន័យអ្នកប្រើប្រាស់របស់សហរដ្ឋអាមេរិកតាមតម្រូវការ ក្រោមការគ្រប់គ្រងដ៏តឹងរ៉ឹង»។

អស់ជាច្រើនឆ្នាំមកនេះ មន្ត្រីអាម៉េរិកបានសម្តែងការព្រួយបារម្ភថា ការចូលប្រើប្រាស់ទិន្នន័យរបស់អ្នកប្រើប្រាស់ ឬទំនាក់ទំនងរបស់រដ្ឋាភិបាលចិន អាចធ្វើឲ្យសន្តិសុខជាតិប្រឈមនឹងហានិភ័យ។ ប៉ុន្តែថាតើការអង្វររបស់គណៈកម្មការទូរគមនាគមន៍សហព័ន្ធអាម៉េរិក នឹងដំណើរការយ៉ាងណានោះ គឺមិនប្រាកដប្រជានោះទេ។

FCC មិនដើរតួនាទីក្នុងការគ្រប់គ្រងសេវាកម្មដែលមានមូលដ្ឋានលើអ៊ីនធឺណិតដូចជា កម្មវិធីទូរស័ព្ទ ហើយកិច្ចខិតខំប្រឹងប្រែងពីមុនរបស់រដ្ឋាភិបាលសហរដ្ឋអាមេរិកក្នុងការហាមឃាត់ TikTok ពីកម្មវិធីរបស់សហរដ្ឋអាមេរិក បានធ្លាក់ចុះចំពេលមានការប្រឈមរបស់តុលាការ៕